یو اے ای : متحدہ عرب امارات میں آنے والے ایکسپو2020 کے دوران سیاحت کو فروغ دینے کے لیے ایمریٹس نے آسٹریلوی اداکار کرس ہیمزورتھ کو اپنی نئی عالمی مہم کا حصہ بنا لیا ہے۔
غیر ملکی خبر رساں ادارےکی رپورٹ کے مطابق ڈیڑھ منٹ کی ویڈیو مہم جسے دو بار آسکر ایوارڈ جیتنے والے ہدایتکار روبرٹ سٹرومبرگ نے ڈائریکٹ کیا ہے ایکسپو2020 کے انعقاد سے30 دن پہلے سامنے آئی ہے۔
اس ویڈیو میں اداکار کرس ہیمزورتھ کہتے ہیں کہ آپ مستقبل دیکھنا چاہتے ہیں تو آئیے، یہ دبئی ہے اور یہ دنیاکا سب سے بڑا شو ہے۔ اس کے ساتھ ہی جین وائلڈر کے ساؤنڈ ٹریک ’پیور امیجینیشن‘ کی دھن آرکیسٹرا پر بجتی سنائی دیتی ہے جسے بچے کورس کی صورت میں گا رہے ہیں۔
یہ مہم ٹیکنالوجی، جدت اور تخلیق کے موضوع پر مبنی ہے، اس ویڈیو کو 2019 میں فلمایا گیا تھا اور چونکہ ابھی ایکسپو2020 کا انعقاد ہونا ہے اس لیے اس میں بے شمار سی جی آئی اینیمیشنز کا استعمال کیا گیا ہے تاکہ بتایا جا سکے کہ یہ تقریب کیسی ہوگی۔
ایک پریس ریلیز میں ہمزورتھ نے بتایا کہ سال2019 میں میں نے ایمریٹس اور ایکسپو2020 کے ساتھ کام کیا تاکہ یہ آگاہی دے سکوں کہ دنیا کے لیے یہ تقریب کتنی اہم ہے۔
ہم سب کے پاس یہ طاقت ہے کہ بہتر مستقبل بنا سکیں اور گذشتہ سال نے ہمیں یہ دکھایا ہے کہ جب ہم ایک ساتھ کام کرتے ہیں تو ممکنات کا سلسلہ لامتناہی ہے۔‘
ان کا مزید کہنا تھا کہ ایکسپو2020 دبئی سے دنیا شراکت کے احساس کے ساتھ ایک دوسرے سے جڑ جائے گی تاکہ حقیقی زندگی کے بارے میں وہ حل فراہم کیے جا سکیں جن سے مستقبل کی نسل کو فائدہ پہنچے گا۔
اگر آپ سفر کر سکتے ہیں اور آپ محفوظ محسوس کرتے ہیں تو میں امید کرتا ہوں کہ آپ ایسا کر سکتے ہیں۔ ایمریٹس ان سیاحوں کو ایکسپو 2020 میں شرکت کرنے کے لیےاعزازی پاسز کی پیشکش کر رہی ہے جو دبئی سے کسی بھی وقت یکم اکتوبر سے 31 مارچ 2021 تک سفر کر رہے ہیں۔
