The news is by your side.

Advertisement

دبئی پولیس آفیسر نے غیرملکی شہری کی خودکشی ناکام بنادی

دبئی: متحدہ عرب امارات کی ریاست دبئی کے پولیس آفیسر نے اپنے کمرے میں خود کشی کرنے والے غیر ملکی شخص کی کوشش کا ناکام بنا کر اُس کی زندگی محفوظ بنادی۔

خلیج ٹائمز کی رپورٹ کے مطابق دبئی پولیس کے تحقیقاتی ڈیپارٹمنٹ کے ڈائریکٹر بریگیڈیئر جمال سلیم الجالف کا کہنا تھا کہ ’ہمارے کمانڈ سینٹر کو جمعرات کی صبح 11 بجے اطلاع موصول ہوئی کہ ایک شخص خودکشی کی کوشش کررہا ہے‘۔اُن کا کہنا تھا کہ غیرملکی شہری معاشی حالات سے تنگ آکر اپنی زندگی ختم کرنا چاہ رہا تھا۔

دبئی پولیس شکایت موصول ہونے کے بعد کم وقت میں ’البادا‘ کے علاقے پہنچی اور مذکورہ شہری کے گھر کا رخ کیا۔ بریگیڈیئر جمال سلیم الجالف کا کہنا تھاکہ ’مالک مکان نے بھی ہماری ٹیم کو اس بات کی تصدیق کی کہ اُن کا کرائے دار کئی روز سے نظر نہیں آرہا‘۔

انہوں نے بتایا کہ یورپین شہری نے اپنے آپ کو کمرے میں بندھ کیا ہوا تھا، ہم نے دروازہ کھلوانے کی کوشش کی مگر  کامیابی حاصل نہ ہوئی تو اسی دوران ہمارا ایک آفیسر دوسری منزل پر گیا اور پھر کھڑکی سے کمرے میں داخل ہوکر اُسے قابو کرلیا، اگر اہلکار کو پہنچنے میں دیر ہوتی نوجوان اپنی زندگی کی بازی ہار جاتا۔

’جب ہمارا آفیسر اندر پہنچا تو دیکھا کہ مذکورہ شخص کی حالت بہت زیادہ خراب ہے اور وہ مشکل سے سانس لے رہا ہے، ہم نے فوراً ہی ایمبولینس طلب کی اور پھر اُسے اسپتال منتقل کیا‘۔

انہوں نے بتایا کہ ’دبئی پولیس کے خصوصی ڈاکٹرز نے مریض کا علاج شروع کیا جس کے بعد اُس کی طبیعت کچھ بہتر ہوئی، بعد ازاں وہ مکمل ہوش میں آگیا، نفسیاتی ڈاکٹرز نے بھی نوجوان کی طبیعت کو قابل اطمینان قرار دے دیا‘۔

fb-share-icon0
Tweet 20

Comments

comments

یہ بھی پڑھیں