ریاض: ای قرعہ اندازی کے ذریعے سعودی عرب کے داخلی عازمین حج کے ناموں کا اعلان ہو گیا۔
تفصیلات کے مطابق سعودی عرب کے نائب وزیر حج و عمرہ ڈاکٹر عبدالفتاح مشاط نے بتایا کہ اس سال اندرون مملکت سے حج درخواستیں دینے والوں کا انتخاب قرعہ اندازی کے ذریعے کیا گیا ہے۔
نائب وزیر کے مطابق اندرون مملکت سے امسال 3 لاکھ کے قریب افراد نے حج کے لیے درخواستیں دیں، جن میں 2 لاکھ 17 ہزار درخواستیں شرائط کے مطابق تھیں، انھوں نے کہا کہ قرعہ اندازی آن لائن کی گئی، اور منتخب افراد کو جلد ایس ایم ایس کے ذریعے مطلع کر دیا جائے گا۔
انھوں نے کہا جن امیدواروں کا نام قرعہ اندازی میں آ گیا ہے انھیں حج کارروائی مکمل کرانے اور حج پیکج کی رقم ادا کرنے کے لیے 48 گھنٹے کی مہلت دی جائے گی، اس کے فوری بعد حج اجازت نامے جاری کیے جائیں گے۔
وزارت حج و عمرہ کے مطابق اس سال اندرون مملکت سے 20 برس سے کم عمر کے عازمین حج سب سے کم تعداد میں اور 51 سے 65 برس کی عمر کے افراد 12 فی صد ہوں گے، مقامی شہریوں اور مقیم غیر ملکیوں کی طرف سے 2 لاکھ 97 ہزار 44 درخواستیں حج کے لیے موصول ہوئی تھیں، ان میں سے 62 فی صد مرد اور 38 فی صد خواتین تھیں، 2 لاکھ 17 ہزار درخواستیں مقررہ شرائط پر پوری اتریں۔ یہ درخواستیں اعتمرنا ایپ اور وزارت کے ای گیٹ کے ذریعے بھیجی گئی تھیں۔
اس سال اندورن مملکت سے حج کے لیے جانے والوں کو منی، مزدلفہ اورعرفات میں جو خیمے فراہم کیے گئے ہیں ان میں عصر حاضر کی تمام سہولتیں فراہم کی گئی ہیں، جب کہ ضیافہ پیکج کے لیے جو خیمے تیار کیے گئے ہیں وہ ہوٹل کے کمروں کی طرح ہیں، ہر خیمے میں حجاج کی سہولت کا پورا خیال رکھا گیا ہے۔
وزارت حج وعمرہ نے اس سال اندرون ملک سے حج کے لیے 3 پیکج متعارف کرائے ہیں جن میں ’منیٰ ٹاورز‘ ، ’ضیافیہ ون‘ اور ’ضیافہ ٹو‘ شامل ہیں۔
منیٰ ٹاورز کا پیکج 14 ہزار 737 ریال تھا جو 794 ریال کمی کے بعد 13 ہزار 943 ریال کر دیا گیا ہے، جب کہ ’ضیافہ ون‘ پیکج کی قیمت 13 ہزار ریال تھی اسے کم کر کے 11 ہزار 970 ریال کیا گیا، تیسرے پیکج ’ضیافہ ٹو‘ کو 10 ہزار 238 ریال سے کم کر کے 9 ہزار 98 ریال کر دیا گیا ہے۔
