بنگلہ دیش کرکٹ ٹیم کو بڑا دھچکا، فاسٹ بولر عبادت حسین طویل عرصے سے انجری کے باعث ایشیا کپ 2023 کے اسکواڈ سے دستبردار ہو گئے۔
اس حوالے سے بنگلہ دیش کرکٹ بورڈ (بی سی بی) نے منگل کو اعلان کیا ہے۔
دس روز قبل بی سی بی نے ایشیا کپ کے لیے 17 رکنی اسکواڈ کا اعلان کیا تھا جس میں عبادت حسین بھی شامل تھے۔ ایشیا کپ کے لیے ٹیم کی تیاریاں بھی زوروں پر تھیں جب کہ تجربہ کار آل راؤنڈر شکیب الحسن کو ٹیم کا کپتان بھی مقرر کیا گیا۔
گزشتہ ماہ افغانستان کے خلاف ون ڈے سیریز کے دوران طبی بنیادوں پر عبادت حسین ان فٹ ہوئے تھے اور انہیں ڈاکٹرز نے صحت یابی کو یقینی بنانے کےلیے مزید آرام کا مشورہ دیا تھا۔
بی سی بی نے عبادت حسین کے متبادل کے طور پر تنظیم حسن ثاقب کو نامزد کیا ہے۔ نظرثانی شدہ اسکواڈ میں عبادت کی جگہ لینے والے 20 سالہ غیر متوقع فاسٹ باؤلر تنظیم حسن ثاقب ہیں۔ تنظیم اس سے قبل 2020 انڈر 19 ورلڈ کپ کے دوران بنگلہ دیش کی فاتح انڈر 19 ٹیم کا حصہ رہ چکے ہیں۔
