اسلام آباد : وزیرخزانہ اسحاق ڈارکی زیرصدارت اقتصادی رابطہ کمیٹی کا اجلاس ہوا، جس میں مختلف منصوبوں اور گرانٹ کی منظوری دی گئی۔
اس حوالے سے ذرائع کا کہنا ہے کہ اجلاس میں کراچی صنعتی اسٹیٹ کی سڑکوں کی مرمت کیلئے ایک ارب روپے کی تکنیکی ضمنی گرانٹ کی منظوری دی گئی۔
اجلاس میں رواں مالی سال کیلئے پاور ڈویژن کو30کروڑ روپے کی تکنیکی ضمنی گرانٹ جبکہ کسان پیکیج کے تحت 5سال پرانے ٹریکٹرز کم ڈیوٹی پردرآمد کرنے کی منظوری دی گئی۔
اس کے علاوہ خیبرپختونخوا کے ٹل بلاک سے کم بی ٹی یو گیس تھرڈ پارٹی کو دینے کی منظوری دی گئی ہے، اجلاس کے اعلامیے میں بتایا گیا ہے کہ فوجی فاؤنڈیشن کو بیرون ملک 49لاکھ ڈالر کی سرمایہ کاری کی اجازت دی گئی۔
اعلامیہ میں کہا گیا ہے کہ پی او ایل، اٹک آئل اور پولینڈ کی کمپنی کو سندھ میں تیل ،گیس کی تلاش اور سندھ کے کھیرتھر بلاک میں تیل و گیس کی تلاش کیلئے ورکنگ انٹرسٹ دینے کی منظوری دی گئی ہے۔
