اسلام آباد : الیکشن کمیشن نے چئرمین پی ٹی آئی عمران خان کی قومی اسمبلی کے ضمنی انتخابات میں 7 حلقوں سے کامیابی کا نوٹی فکیشن جاری کرنے کا حکم دے دیا۔
تفصیلات کے مطابق الیکشن کمیشن عمران خان کے ضمنی انتخابات میں 7 حلقوں پر کامیابی کا نوٹیفکیشن جاری کرنے سے متعلق محفوظ شدہ فیصلہ سنا دیا۔
الیکشن کمیشن نے تحریک انصاف کی استدعا منظور کر لی اور عمران خان کی جانب سےتاخیر سے جمع انتخابی اخراجات کودرگزرکر دیا۔
فیصلے میں الیکشن کمیشن نے عمران خان کے تمام 7حلقوں سے نوٹی فکیشن جاری کرنے کا حکم دے دیا۔
عمران خان کے وکیل بیرسٹر علی گوہر بھی فیصلے کے وقت الیکشن کمیشن میں موجود تھے۔
یاد رہے الیکشن کمیشن نے عمران خان کی جانب سے اخراجات کی تفصیلات جمع نہ کرنے پر نوٹس لیا تھا اور انتخابی اخراجات سے متعلق 20 دسمبر کو فیصلہ محفوظ کیا تھا۔
واضح رہے کہ عمران خان نے گزشتہ سال ہونے والے قومی اسمبلی کے ضمنی انتخابات میں عمران خان این اے 22 مردان، این اے 24 چارسدہ، این اے 31 پشاور پر کامیابی حاصل کی تھی۔
اس کے علاوہ سابق وزیراعظم نے این اے 108 فیصل آباد، این اے 118 ننکانہ، این اے 239 کورنگی اور این اے 45 کرم سے بھی فتح سمیٹی تھی۔
عمران خان نے قومی اسمبلی کے 6 حلقوں میں بیک وقت الیکشن جیت کر اپنا ہی 5 حلقے جیتنے کا ریکارڈ بھی توڑ دیا تھا۔
