کراچی کے 7 اضلاع میں بلدیاتی انتخابات کروانے کے لیے الیکشن کمیشن آف پاکستان نے سندھ حکومت کو خط لکھ کر جواب مانگ لیا۔
الیکشن کمیشن نے خط میں لکھا کہ الیکشن کمیشن سندھ میں فوری بلدیاتی انتخابات چاہتا ہے، الیکشن کمیشن اپنا آئینی فرض پورا کرنا چاہتا ہے۔
خط میں لکھا گیا کہ سندھ حکومت 31 اکتوبر تک جواب جمع کرائے، سندھ حکومت سکیورٹی سمیت دیگر انتظامات کب کر سکتی ہے، کراچی اور حیدر آباد میں بلدیاتی الیکشن کا دوسرا مرحلہ کرانا ہے۔
واضح رہے کہ 18 اکتوبر کو حکومت کی درخواست پر الیکشن کمیشن نے کراچی میں بلدیاتی انتخابات کو تیسری بار ملتوی کرنے کا اعلان کیا۔
انتخابات ملتوی کرنے کا فیصلہ چیف الیکشن کمشنر کی زیرِ صدارت اجلاس میں کیا گیا تھا۔ اجلاس میں وفاقی حکومت کے خط کا جائزہ لیا گیا جس میں وفاق نے بلدیاتی الیکشن کے لیے سکیورٹی اہل کار دینے سے معذرت کی تھی جبکہ سندھ حکومت نے 16 ہزار سکیورٹی اہلکاروں کا مطالبہ کیا تھا۔