قاہرہ: شمالی مصر کے صوبے البحیرۃ میں ایک ہی خاندان کے 7 افراد کے قتل کی واردات معمہ بن گئی۔
غیرملکی خبررساں ادارے کی رپورٹ کے مطابق شمالی مصر کے صوبے البحیرۃ میں ایک ہی خاندان کے 7 افراد کے سر تن سے جدا پائے گئے تھے، قتل کی لرزہ خیز واردات سیکیورٹی حکام کے لیے تاحال معمہ بنی ہوئی ہے۔
البحیرۃ سیکیورٹی فورس مقامی باشندوں کی رپورٹ پر فوری جائے وقوعہ پر پہنچی تو گھر کے اندر 7 افراد کی لاشیں پڑی تھیں، ان کے سر تن سے جدا تھے جبکہ گھر میں آتشزدگی کے نشانات بھی نظر آئے۔
رپورٹ کے مطابق البحیرۃ میں کفر الدوار تحصیل کی بستی علی کے باشندوں نے واردات کی اطلاع پولیس کو اس وقت دی جب انہوں نے دیکھا کہ کچھ لوگ گھر میں آگ لگانے کی کوشش کررہے ہیں، ملزمان علاقہ مکینوں کو آتا دیکھ کر جائے وقوعہ سے فرار ہوگئے۔
مقتولین کے ایک رشتے دار کا کہنا ہے کہ ملزمان کی گرفتاری اور انہیں عدالت کے سامنے پیش کرنے کا بے چینی سے انتظار ہے۔
ابتدائی تحقیق سے پتا چلا ہے کہ تمام افراد کو قتل کیا گیا ہے ملزمان نے جرم کے نشانات مٹانے کے لیے ہی گھر میں آگ لگائی تھی۔
پبلک پراسیکیوشن کا کہنا ہے کہ خاندان کے سربراہ اور اس کے بچوں کی گردن پر تیز دھار آلے کے زخم ہیں، ہلاک ہونے والوں میں خاندان کا سربراہ، اس کی بیوی، ماں اور 4 بیٹے شامل ہیں۔
سیکیورٹی حکام کا کہنا ہے کہ ایسا لگتا ہے کہ قتل کا سبب خاندان کا وہ سربراہ ہے جس نے گزشتہ برس ایک مقدمے میں گواہی دی تھی اور یہ کیس کا واحد گواہ تھا، عدالت نے اس کی گواہی کے بعد گیارہ افراد کو دس، دس برس قید کی سزا سنائی تھی۔
مصری سیکیورٹی حکام کا کہنا ہے کہ ملزمان کی تلاش میں چھاپے مارے جارہے ہیں، ملزمان کو جلد گرفتار کرلیا جائے گا۔
