اسلام آباد : عام انتخابات 2018 کی تیاریوں کی تیاریوں کے سلسلے میں الیکشن کمیشن نے اپنے افسران کی تربیت کا آغاز کردیا ہے۔
اسلام آباد سیکرٹری الیکشن کمیشن بابر یعقوب نے افتتاحی تقریب سے خطاب میں کہا کہ چاروں صوبوں کے 28 افسران پانچ ہفتوں تک تربیت حاصل کرینگے، سیکرٹری الیکشن کمیشن کا کہنا تھا کہ الیکشن کمیشن میں پہلے تربیت کا کوئی طریقہ کار نہیں تھا، الیکشن کمیشن کے افسران کو صرف پرموٹ کیا جاتا رہا ہے۔
ان کا کہنا تھا کہ ہم تربیت گاہیں تو بنا لیتے ہیں لیکن پھر اس پر کام نہ کرکے تباہ کردیتے ہیں، جوڈیشل انکوائری کمیشن نے رپورٹ میں افسران کی تربیت کی کمی درست نشاندہی کی گئی، الیکشن کمیشن کے متعدد افسران کو الیکٹرانک ووٹنگ مشین کے بارے میں علم نہیں۔
انہوں نے انکشاف کیا کہ ماضی کے انتخابات میں نابینا ، معذور اور بیمار لوگوں کو انتخابی عملے کے طور پر لگایا گیا۔
سیکریٹری الیکشن کمیشن کا کہنا تھا کہ آئندہ عام انتخابات کے لئے وفاق اور صوبوں سے انتخابی عملہ کے لئے نام مانگ لئے ہیں، انھوں نے بتایا کہ آئندہ عام انتخابات میں ای وی ایم کا استعمال تجربات کی کامیابی کے بعد ہی کرینگے، الیکشن کمیشن جلد ضمنی انتخابات میں الیکٹرانک اور بائیو میٹرک مشینوں کا تجرباتی بنیادوں پر استعمال کرینگے۔
