آزاد کشمیر میں نئے وزیراعظم کا انتخاب ڈیڈ لاک کا شکار ہے ایک ہفتے سے خالی اہم ترین عہدے کے لیے مسلسل پانچ روز سے اجلاس بغیر کارروائی ملتوی ہوگئے۔
اے آر وائی نیوز کے مطابق آزاد کشمیر کی ہائیکورٹ کی جانب سے وزیراعظم آزاد کشمیر سردار تنویر الیاس کو نا اہل قرار دیے جانے کے بعد یہ انتہائی اہم عہدہ ایک ہفتے سے خالی ہے اور نئے وزیراعظم کا انتخاب ڈیڈ لاک کا شکار ہے۔
ایک ہفتے کے دوران پانچ بار آزاد کشمیر کی قانون ساز اسمبلی کے اجلاس منعقد ہوئے تاہم وہ بغیر کسی کارروائی کے ملتوی کر دیے گئے ہیں۔ گزشتہ روز بھی اجلاس ملتوی کرنے پر اپوزیشن اراکین نے شدید احتجاج کیا تھا۔
دوسری جانب وزیراعظم آزاد کشمیر کے انتخاب کے لیے متحدہ اپوزیشن کا مشترکہ اجلاس ہوا ہے۔ ذرائع کے مطابق اجلاس میں حکمراں جماعت کو ٹف غائم دینے کی حکمت عملی طے کی گئی ہے۔
واضح رہے کہ گزشتہ ہفتے آزاد کشمیر ہائی کورٹ کے فل کورٹ نے پی ٹی آئی سے تعلق رکھنے والے وزیراعظم آزاد کشمیر سردار تنویر الیاس کو توہین عدالت کیس میں نا اہل قرار دیا تھا۔
