چیف الیکشن کمشنر راجہ سکندر سلطان کا کہنا ہے کہ انتخابات میں فوج اور رینجرز کی مدد بھی لی جائے گی۔
تفصیلات کے مطابق الیکشن کمیشن کا کہنا ہے کہ سندھ میں 2 کروڑ 67 لاکھ 83 ہزار 254 رجسٹرڈ ووٹرز حق رائے دہی استعمال کریں گے۔ راجہ سکندر سلطان نے کہا ہے کہ انتخابات میں فوج اور رینجرز کی مدد بھی لی جائے گی۔
الیکشن کمیشن نے بتایا کہ چیف سیکریٹری سندھ کی جانب سے تمام احکامات پرعملدرآمد کی یقین دہانی کرائی گئی ہے۔
سندھ میں قومی اسمبلی کے 61، صوبائی اسمبلی کے 130 نشستوں پر انتخابات ہونگے۔ سندھ میں 19 ہزار236 پولنگ اسٹیشنز بنائے جائیں گے۔
الیکشن کمیشن نے کہا کہ سندھ میں 4 ہزار 430 پولنگ اسٹیشن انتہائی حساس ہیں جب کہ 8 ہزار 80 اسٹیشنز کو حساس قراردیا گیا ہے۔
چیف سیکریٹری سندھ کا کہنا تھا کہ سندھ حکومت انتخابات کیلئے الیکشن کمیشن کو بھرپور تعاون فراہم کرے گی، الیکشن کمیشن احکامات کے تحت 100 فیصد ٹرانسفر پوسٹنگ پرعملدرآمد کررہی ہے۔
چیف سیکریٹری سندھ کا مزید کہنا تھا کہ پولنگ اسٹیشنز پرتمام تر سہولتوں کی دستیابی کو یقینی بنایا جائے گا۔
آئی جی سندھ نے کہا کہ سندھ پولیس کی جانب سےسیکیورٹی پلان تیار کیا گیا ہے، عام انتخابات میں 1 لاکھ 10 ہزار 334 پولیس اہلکار فرائض انجام دیں گے۔
انھوں نے کہا کہ کوئیک رسپانس فورس بھی ناخوشگوار واقعے کی صورت میں الرٹ ہوگی۔ الیکشن کے پُرامن انعقاد کیلئے کوئی کسر نہیں چھوڑی جائے گی۔
