اسلام آباد : مسابقتی کمیشن نے الیکٹرک کیبل بنانے والی 18 کمپنیوں کو اپنی کیبل کی پیکیجنگ پرکیبل کے ساتھ موجود کیش کوپن اور ٹوکن کو ظاہر نہ کرنے اور مسابقتی ایکٹ کے سیکشن ٹین کی خلاف ورزی پر ایک کروڑ 80 لاکھ روپے جرمانہ عائد کر دیا ہے۔
مسابقتی کمیشن نے جن کمپنیوں پر جرمانہ عائد کیا ان میں ڈان کیبلز ،جی ایم کیبلز، فاسٹ کیبل،ہائی ٹیک انگلش کیبلز، پاک مظفر کیبل،الفا پلس وائر کیبل،ہائی ایس انگلش کیبل ، گولڈ رائل کیبل ، ظفر کیبل، نیشن کیبل، پلر کیبل،ویلکم کیبلز،دیوان کیبلز، ای فلکس کیبلز،ہیرو کیبل، فالکن کیبل، لیئر کیبلز اور رانا کیبلز شامل ہیں ۔
اس معاملے پر سی سی پی کی جانب سے کی گئی انکوائری سے ظاہر ہوا کہ یہ کمپنیاں اپنی الیکٹرک کیبل کے ساتھ کیش کوپن رکھنے اور اس کو پیکنگ پر ظاہر نہ کرنے میں ملوث تھیں۔
سی سی پی آرڈر کے مطابق اس کیس کی سماعتوں کے دوران تقریباَ تما م کمپنیوں نے اپنی پیکیجنگ پر الیکٹرک کیبل کے ساتھ موجود کیش کوپن کی موجودگی کو ظاہر نہ کرنے کی غلطی کو تسلیم کیا اور مستقبل میں ایسا کبھی نہ کرنے کا عہد کیا ۔
سی سی بنچ نے فاسٹ کیبل اور جی ایم کیبل پر 50لاکھ روپے فی کس جرمانہ عائد کیا ہے اور باقی سولہ کمپنیو ں پر 5لاکھ روپے فی کس جرمانہ عائد کیا ہے اور مستقبل میں ایسی کسی بھی دھوکہ دھی سے سختی سے منع کیا ہے۔
