بجلی کے بلوں میں حالیہ اضافے پر کےالیکٹرک کے ترجمان نے کہا ہے کہ پاکستان میں ریگولیٹڈ نظام کے ذریعے بجلی کی قیمتوں کا تعین کیا جاتا ہے۔
بجلی کمپنی کے ترجمان نے واضح کیا کہ ادارہ بجلی کی بڑھتی ہوئی قیمت سے متعلق موجودہ صورتحال کا مکمل ادراک رکھتا ہے، قیمتوں کا تعین اور ٹیکسوں کا نفاذ حکومت پاکستان اور نیپرا اتھارٹی کی ذمہ داری ہے۔
ترجمان کے مطابق اگر حکومت پاکستان اور نیپرا کی جانب سے نرخوں میں ردوبدل کیا جاتا ہے تو کے۔ الیکٹرک سمیت تمام ڈسکوز اس پر عملدرآمد کرنے کے پابند ہوتے ہیں، کےالیکٹرک کا بجلی کی قیمتوں میں اضافے اور ٹیکسز کے نفاذ میں کوئی کردار نہیں ہے، ادارے کے نفع اور نقصان کا تعلق سرمایہ کاری اور کارکردگی کی بہتری سے منسلک ہے۔
انھوں نے اس بات پر بھی زور دیا کہ بلوں کی بروقت ادائیگی بجلی کی بلاتعطل فراہمی کے لیے لازمی ہے جب کہ بجلی کی چوری، غیر قانونی کنکشنز اور عدم ادائیگیاں بجلی کی فراہمی میں رکاوٹ کا باعث بنتی ہیں۔
کےالیکٹرک کا عملہ بجلی کی چوری کی روک تھام کے لیے انتھک کوشش کر رہا ہے لیکن چند علاقوں میں ان کو جارحانہ رویے کا سامنا کرنا پڑتا ہے، انھیں اپنی ذمہ داریوں کی ادائیگی سے روک دیا جاتا ہے جس سے بجلی فراہمی میں تعطل آسکتا ہے۔
ترجمان کے مطابق کے الیکٹرک نے اپنی ٹیموں کو تحفظ فراہم کرنے کے لیے متعلقہ اداروں سے درخواست کی ہے، ادارہ اپنے لوگوں کی قدر کرتا ہے اور ان کےخلاف کسی بھی قسم کی جارحیت برداشت نہیں کرے گا۔
