اسلام آباد : پاکستان میں رواں سال اپریل میں ہونے والے ضمنی انتخابات میں سامنے آنے والی مبینہ بے ضابطگیوں اور دھاندلی کے الزامات کے بعد حکومت نے الیکٹرانک ووٹنگ مشین متعارف کرائی تھی۔
پی ٹی آئی حکومت نے انتخابی اصلاحات، اووسیز پاکستانیز کو ووٹ کا حق دینے اور شفاف انتخابات کے انعقاد کےلیے وزارت سائنس وٹیکنالوجی کی مدد سے نئی اور جدید الیکڑونک ووٹنگ مشین تیار کی۔،
حکومت کی جانب سے ملک میں الیکٹرانک ووٹنگ مشین متعارف کراتے ہوئے اپوزیشن اور دیگر اسٹیک ہولڈرز کو دعوت دی گئی ہے کہ وہ اصلاحات کے حوالے سے حکومت کے ساتھ بیٹھ کر بات چیت شروع کریں۔
کامسیٹس یونیورسٹی کے طلباء کی تیار کردہ ووٹنگ مشین کیسے کام کرتی ہے اس حوالے سے اے آر وائی نیوز کے نمائندے عبدالقادر نے وفاقی وزیر سائنس وٹیکنالوجی شبلی فراز کے ساتھ ووٹنگ مشین پر اپنا ووٹ کاسٹ کرکے دکھایا۔
اس موقع پر وفاقی وزیر اور کامسیٹس یونیورسٹی کے طلباء نے مشین سے متعلق تفصیلات بتائیں اور اس کے فوائد اور سیکیورٹی سے آگاہ کیا۔
وفاقی وزیر نے ووٹنگ مشین میں علامتی طور پر اپنا ووٹ کاسٹ کرکے دکھایا، اس سے قبل کامسیٹس یونیورسٹی کے طالب علم نے بتایا کہ پہلے پریزائنڈنگ آفیسر تمام پولنگ ایجنٹوں کی موجودگی میں مشین کواسٹارٹ کرے گا۔
جس کے بعد مشین کے بنیادی بٹنوں کو سربمہر کردیا جائے گا اور سیل لگا نے کے بعد ووٹنگ کا عمل شروع کیا جائے گا، اس مشین کی خاص بات یہ ہے کہ اس سے صرف ایک ووٹ ہی کاسٹ ہو سکتا ہے۔
