کویت : ترکیہ کے صدر رجب طیب اردوان نے سعودی بادشاہ شاہ سلمان اور ولی عہد و وزیراعظم محمد بن سلمان کو ماڈرن ترک الیکٹرک گاڑیاں تحفے میں پیش کی ہیں۔
گزشتہ روز ترک صدر خلیجی ممالک کے 3 روزہ دورے پر سعودی عرب پہنچے جہاں انہوں نے جدہ میں سعودی ولی عہد محمد بن سلمان اور دیگر حکام سے اہم ملاقاتیں کیں۔
دورے میں ترک صدر نے شاہ سلمان اور ولی عہد محمد بن سلمان کو ترکیہ کی لوکل مینوفیکچرڈ دو الیکٹرک گاڑیاں تحفے میں دیں۔
سعودی ولی عہد نے طیب اردوان کو الیکٹرک گاڑی میں بٹھا کر ٹیسٹ ڈرائیو کرتے ہوئے تحفہ پیش کرنے پر اپنے معزز مہمان کا شکریہ ادا کیا۔
واضح رہے کہ ترک صدر طیب اردوان گزشتہ روز خلیجی ممالک کے 3 روزہ دورے پر سعودی عرب پہنچے، سعودی وزیر خارجہ فیصل بن فرحان اور دیگر حکام نے جدہ کے ہوائی اڈے پر ان کا استقبال کیا۔
خبر ایجنسی کے مطابق ترک صدر طیب اردوان کی سعودی ولی عہد شہزادہ محمد بن سلمان سے ملاقات ہوئی جس میں دونوں رہنماؤں کے درمیان سرمایہ کاری، تجارت اور علاقائی امور پر بات چیت ہوئی۔
صدر طیب اردوان کے ہمراہ ان کی کابینہ کے ارکان اور دیگر ترک حکام بھی موجود ہیں، سعودی عرب کے بعد ترک صدر قطر اور متحدہ عرب امارات جائیں گے۔
