کراچی: ایتھوپین ایئر لائن نے پاکستان کے لیے اپنا فلائٹ آپریشن شروع کر دیا، ادیس ابابا سے کراچی آنے والی پرواز کو واٹر سلوٹ پیش کیا گیا۔
تفصیلات کے مطابق پاکستان کے لیے ایتھوپین ایئر لائن کے فلائٹ آپریشن کا باقاعدہ آغاز ہو گیا، ایتھوپیا کا اعلیٰ سطح کا وفد پہلی فلائٹ سے کراچی پہنچا، جہاں وزیر اعلیٰ سندھ مراد علی شاہ نے وفد کا استقبال کیا۔
ایتھوپین وفد میں وزیر مملکت امور خارجہ مسگانواریگا و دیگر اعلیٰ حکام شامل تھے، ایتھوپیا کے وزیر مملکت امور خارجہ مسگانواریگا وفد کے ہمراہ 3 روزہ دورے پر پاکستان آئے ہیں۔
پہلی پرواز میں ایتھوپیا کے 3 وزیر مملکت، اور ان کی وزارتوں کے اعلیٰ افسران سوار تھے، پرواز میں سوار مسافروں کی مجموعی تعداد 110 تھی، وزیر اعلیٰ سندھ نے ایتھوپین وزرا، سفارت کاروں اور صنعت کاروں کو خوش آمدید کہا۔
وزیر اعلیٰ سندھ نے اولڈ ٹرمینل وی آئی پی لاؤنج میں پرواز کی آمد کا کیک کاٹ کر افتتاح کیا، اور ایتھوپین وفد کا صوبائی وزرا سے تعارف کروایا۔ انھوں نے کہا ’’ایتھوپین ایئر لائن کا کراچی سے ایتھوپیا اور ایتھوپیا کو کراچی سے جوڑنے کا وسیلہ ہے۔‘‘
وزیر اعلیٰ سندھ نے کہا کہ یہ پروازایں شروع ہونے سے سندھ اور ایتھوپیا میں تجارت اور سیاحت کو فروغ ملے گا، وزیر اعلیٰ سندھ نے مہمانوں کو اجرک اور سندھی ٹوپیاں بھی پہنائیں۔
