عمر کے ساتھ چہرے پر ظاہر ہونے والی جھریوں سے ہر شخص ہی پریشانی کا اظہار کرتا ہے بعض اوقات یہ جھریاں وقت سے ذرا پہلے ہی نمودار ہوجاتی ہیں جس سے چھٹکارا پانا ممکن ہے۔
جھریاں محض بری ہی نہیں لگتیں بلکہ انسان کو اس کی عمر سے بڑا بھی ظاہر کرتی ہیں، وہ افراد جو کم عمری میں ہی اس مسئلے سے دوچار ہیں انہیں اپنے طرز زندگی میں تبدیلی لانے کی اشد ضرورت ہے۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں ڈاکٹر ام راحیل نے جھریوں سے نجات کیلئے نہایت آسان اور سستا حل بیان کیا جس پر عمل کرکے آپ اپنے چہرے کو تروتازہ اور خوبصورت بنا سکتی ہیں۔
ڈاکٹر ام راحیل نے بتایا کہ دو چمچ پیاز کا جوس دو چمچ ٹماٹر کا جوس اور ایک چمچ شہد لیں اور ان کو اچھی طرح مکس کرکے رات کو سونے سے پہلے ایک چمچ پی لیں۔
ان کا کہنا تھا کہ اس مکسچر کو ایک چمچ پینے کے بعد تھوڑا سا اپنے ہاتھوں اور چہرے پر بھی لگا کر سوجائیں اور صبح اٹھ کر دھولیں، اس پر عمل کرنے سے چہرے اور ہاتھوں کی جھریاں ختم ہوجائیں گی۔
ماہرین صحت کے مطابق جن افراد کو قبل از وقت جھریوں کی شکایت ہو ان کو چاہیے کہ اسٹریس بالکل نہ لیں، نیند پوری لیا کریں، صحت مند اور متوازن غذا لیں، گاجر زیادہ کھائیں اور گاجر کا جوس پیئیں ، چقندر اور کھیرے کا استعمال بھی روز مرہ خوراک میں بڑھا دیں۔ اس کے علاوہ اوپر دیا گیا نسخہ بھی جھریوں سے نجات دلانے میں اہم اور مدد گار ثابت ہوگا۔
