اسلام آباد: پنجاب کی مارکیٹس میں معروف برانڈز کی جعلی و غیر معیاری ادویات کی فروخت کا انکشاف ہوا ہے جس کی نشاندہی ریگولیٹری فیلڈ فورس نے کی تھی۔
ریگولیٹری فیلڈ فورس پنجاب نے جعلی دواؤں کے سیمپلز ٹیسٹنگ لیب بھجوائے تھے جبکہ ڈرگ ٹیسٹنگ لیبارٹریز نے دواؤں کے سیمپلز کو جعلی قرار دیا ہے۔
ڈریپ سے جعلی و غیر معیاری دواؤں کا پراڈکٹ ریکال الرٹ جاری کر دیا گیا جس میں بریسٹ کینسر، امراض نسواں اور اینٹی بائیوٹک دوا کے تین بیچ کو جعلی قرار دیا گیا۔
متعلقہ: 5 معروف بین الاقوامی کمپنیوں کی جعلی ادویات تیار ہونے کا انکشاف
الرٹ کے مطابق متاثرہ دواؤں جعلی سالٹ سے تیار کی گئی تھیں، جعلی دواؤں کے پیکٹس پر معروف فارما کمپنیز کی تفصیلات درج تھیں۔ فارما کمپنیز نے ادویات کے تینوں بیچز سے اظہار لاتعلقی کیا ہے۔ کمپنیز ادویات کے تینوں بیچز کی تیاری اور سپلائی سے انکاری ہیں۔
امراض نسواں کی گولی ڈوفیسٹون کا بیچ 223298، چھاتی کے سرطان کی گولی فیمیرا کا بیچ TTT60، اینٹی بائیوٹک انجکشن اوکسیڈل کا بیچ 050K کو جعلی و غیر معیاری قرار دیا گیا۔
پراڈکٹ کے مطابق جعلی دواؤں کی سیفٹی و کوالٹی غیر واضح ہے، ان ادویات کے استعمال سے علاج متاثر ہو سکتا ہے۔
دوسری جانب ڈریپ کی فیلڈ فورس کو مارکیٹ میں سرویلنس بڑھانے اور جعلی ادویات ضبط کرنے کی ہدایت جاری کر دی گئی۔
