شہدائے پاک فوج کے لواحقین نے شہداء ارضِ پاک کے بارے میں اپنے خیالات کا اظہار اور عوام کو پیغام دیا ہے۔
کیپٹن جواد اکرام شہید کی والدہ اور سپاہی عمران شہید کی بیٹی نے شرپسندوں سے سوالات کیے، کہا شہید بچوں کے خون کی ہی لاج رکھ لیتے، شہیدوں کی تصویروں کو کیوں جلاتے ہیں؟
کیپٹن جواد اکرام شہید کی والدہ نے اظہارِ خیال کرتے ہوئے کہا کہ ’’میرے 2 بیٹے شہید ہو چکے، اللہ پاک ان کے درجات بلند فرمائے، مجھے آج بہت ہی دکھی دل کے ساتھ کہنا پڑرہا ہے کہ مجھے بہت افسوس ہوا کہ جن لوگوں نے بھی ہماری فوجی تنصیبات اور املاک کو نقصان پہنچایا، اس کا مجھے بہت دکھ ہوا‘‘۔
انہوں نے کہا کہ کم از کم ہمارے شہید بچوں کے خون کی ہی لاج رکھ لیتے، اتنا ہی سوچ لیتے کہ پاکستان کتنی عظیم قربانیوں سے بنا ہے، ہمارے بچوں نے اس مٹی میں اپنا خون ملایا ہے، اب جب بھی کوئی شہید ہوتا ہے تو ایسا لگتا ہے کہ میرا بیٹا شہید ہوا ہے۔
سپاہی عمران شہید کی بیٹی نے پیغام دیاکہ ’کیا قصور ہے ان لوگوں کا جنہوں نے وطن کے لئے قربانی دی، ہم یتیم ہو جاتے ہیں تو آپ لوگ شہیدوں کی تصویروں کو کیوں جلاتے ہیں، ہم یتیم آپ لوگوں کے لیے ہوتے ہیں۔
سپاہی عمران شہد کی بیتی نے کہا کہ میں اپنے بابا سے کہوں گی کہ آپ نے ان لوگوں کے لیے جان دی جو شہیدوں کی تصویریں تک جلا دیتے ہیں، جو شہداء سے محبت نہیں کر سکتے تو آپ نے ان کے لئے جان دی ہے، جب ہم دوسرے بچوں کے ماں باپ کو ان کے ساتھ دیکھتے ہیں تو ہمارے اوپر کیا گزرتی ہو گی؟۔
