کراچی : والد کے تشدد سے تین سالہ بچی کی ہلاکت کے واقعے پر پولیس نے بچی کے باپ کو گرفتار کرکے مقدمہ درج کرلیا، باپ نے زیادہ بھیک مانگنے کیلئے بچی کو جلا دیا تھا۔
تفصیلات کے مطابق کراچی کورنگی زمان ٹاؤن میں والد کے تشدد سے تین سالہ بچی کی ہلاکت کا مقدمہ درج کرتے ہوئے بچی کے قتل میں ملوث باپ کو گرفتارکرلیا۔
پولیس نے بتایا کہ مقدمہ مقتولہ بچی کے نانا محمد منظور کی مدعیت میں درج کیا، مقدمہ قتل بالسبب کی دفعہ کے تحت درج کیا گیا ہے۔
مدعی کا کہنا ہے کہ چھبیس جولائی کی صبح دس بجے چاند میاں میری نواسی کو بھیک مانگنے کیلئے گھر سے لیکر گیا تھا اور ستائیس جولائی کو چاند میاں سے رات آٹھ بجے بچی واپس لی تو فیضہ آگ سے جھلس کر زخمی تھی۔
مقتولہ بچی کے نانا کا کہنا تھا کہ ملزم چاند میاں اپنی بیوی سے بھی بھیک منگواتا تھا، ملزم کے بھیک منگوانے کی وجہ سے میری بھانجی شوہر کا گھر چھوڑ کر ماں کے گھر چلی گئی تھی۔
مدعی نے الزام عائد کیا کہ تین سالہ فیضہ جھلسنے کی وجہ سے جاں بحق ہوئی، ملزم چاند میاں نشے کا عادی اور بھیک مانگتا ہے۔
