اسلام آباد : تحریک انصاف کے رہنما فوادچوہدری نے مسلم لیگ ن کو مشورہ دیا کہ جلد سے جلد نئے الیکشن کا اعلان کرے۔
تفصیلات کے مطابق تحریک انصاف کے رہنما فوادچوہدری نے میڈیا سے گفتگو کرتے ہوئے کہا کہ اللہ تعالی نے الیکشن میں بہت کرم کیا ہے، شہباز شریف کو اب استعفی دیکر نئے الیکشن کا اعلان کر دینا چاہیے۔
فوادچوہدری کا کہنا تھا کہ اب ہمارے لائحہ عمل سے زیادہ ن لیگ اور پیپلز پارٹی کا لائحہ عمل اہم ہے، جب تک سیاست ٹھیک نہیں ہوگی تب تک معیشت کیسے ٹھیک ہوگی۔
سابق وزیر نے کہا کہ پاکستان کا مسئلہ سیاسی ہے، جس نے سیاسی طریقے سے حل ہونا ہے، مسلم لیگ ن کو مشورہ ہے کہ جلد سے جلد نئے الیکشن کا اعلان کرے۔
ان کا مزید کہنا تھا کہ بیٹھ کر فریم ورک طے کریں اور الیکشن کمیشن پر بات چیت کی جائے۔
خیال رہے تحریک انصاف نے پنجاب میں میدان مارلیا اور پی ڈی ایم امیدواروں کوشکست دے دی، پی ٹی آئی نے بیس میں سے پندرہ نشستوں پر کامیابی حاصل کی۔
غیرسرکاری نتائج کے مطابق مسلم لیگ ن چارنشستوں پر کامیاب ہوئی جبکہ ایک نشست پر آزاد امیدوار نے کامیابی حاصل کی۔
