اسلام آباد: جمعیت علمائے اسلام ف کے سربراہ مولانا فضل الرحمان نے بلاول بھٹو زرداری کے بیان پر رد عمل دیتے ہوئے کہا ہے کہ بلاول کا بزرگوں سے متعلق بیان خود ان کے والد کے حوالے سے دیا گیا ہے۔
تفصیلات کے مطابق آج منگل کو میاں نوازشریف ایک وفد کے ساتھ مولانا فضل الرحمان سے ملاقات کے لیے ان کے گھر تشریف لے گئے تھے، وفد میں شہباز شریف، مریم نواز اور اسحاق ڈار شامل تھے، نواز شریف نے مولانا سے خوشدامن کے انتقال پر تعزیت کی، ملاقات میں آئندہ انتخابات اور سیٹ ایڈجسٹمنٹ پر بھی مشاورت ہوئی۔
بعد ازاں مولانا فضل الرحمان نے میڈیا سے گفتگو میں کہا کہ طے ہوا ہے کہ ن لیگ کے ساتھ مستقبل میں بھی پوری مفاہمت اور ہم آہنگی کے ساتھ مل کر چلنا چاہیں گے، ناجائز حکومت کے ساتھ جدوجہد میں بھی ساتھ رہے، ہم دیگر جماعتوں سے بھی ہمارے روابط رہیں گے۔
ان لوگوں کو گھر بٹھانا ہے جو دو یا تین بار وزیر اعظم بن چکے ہیں، بلاول بھٹو
انھوں نے کہا کہ ہماری سیاست بچوں کے حوالے نہیں ہونی چاہیے، بچے اور بڑے کی بات میں فرق ہوتا ہے، بلاول بھٹو نے بزرگوں سے متعلق بیان اپنے والد کے لیے دیا ہے۔ مولانا نے کہا بلاول بھٹو نہیں جانتے ہم نے ماضی میں کیا کچھ دیکھا اور سنا، ہم نے پیپلز پارٹی کے خلاف بھی انتہا پسندانہ رویہ اختیار نہیں کرنا۔
سربراہ جے یو آئی نے شفاف انتخابات کے حوالے سے کہا ’’ہم سمجھتے ہیں ادارے اپنی حدود میں فرائض کی ادائیگی کریں، پاکستان اب کسی متنازع الیکشن کا متحمل نہیں ہو سکتا۔‘‘
سفیروں سے ملاقاتوں کے متعلق انھوں نے کہا ’’ہم کسی ملک کے سفیر سے ملاقات سے انکار نہیں کرتے، لیکن امریکی سفیر کسی سے ملتا ہے تو وہ مداخلت کی نظر سے دیکھا جاتا ہے، ملک میں اب بھی سازشیں ہو رہی ہیں، یہ سازشیں دوبارہ سر نہ اٹھا سکیں ان کے لیے سب کو سوچنا ہے۔‘‘
