اسلام آباد: فیڈرل بورڈ آف ریونیو نے کہا ہے کہ مالی سال 24-2023 کیلئے محصولات کا ہدف باآسانی حاصل کرلیا گیا ہے۔
ایف بی آر نے بتایا کہ 9252 ارب روپے ہدف کے مقابلے میں اس بار 9306 ارب جمع کیے گئے ہیں، گزشتہ مالی سال کے مقابلےمیں محصولات کی وصولی میں 30 فیصد اضافہ ہوا، پچھلے مالی سال کے 7164 ارب کے مقابلے میں 2142 ارب زائد جمع کیے گئے۔
وفاقی ادارے نے کہا کہ وزیراعظم اور وزیر خزانہ کی براہ راست دلچسپی سے ٹیکس سسٹم میں نمایاں اسٹریکچرل بہتری آئی، پالیسی شفٹ کی وجہ سے مقامی وسائل کو متحرک کرنے پر زیادہ توجہ مبذول کی گئی۔
ایف بی آر کے مطابق امیر اور باوسائل طبقہ پر براہ راست ٹیکس بڑھائے گئے، مالی سال 24-2023 کے دوران 469 روپے کے ریفنڈز جاری کیے گئے۔
موجودہ مالی سال کے دوران براہ راست ٹیکسز کا حصہ 47 فیصد رہا، ڈومیسٹک ٹیکسز کی مد میں 6128 ارب اور درآمدی ٹیکسز کی مد میں 3178 ارب روپے جمع کیے گئے۔
ادارے نے کہا کہ انکم ٹیکس کی مد میں 4528 ارب روپے جمع کیے گئے، سیلز ٹیکس کی مد میں 3098 ارب روپے جمع کیے گئے۔
ایف بی آر نے بتایا کہ فیڈرل ایکسائز ڈیوٹی کی مد میں 576 ارب روپے جمع کیے گئے، مالی سال 24-2023 میں کسٹمز ڈیوٹی کی مد میں 1104 ارب کے محصولات جمع ہوئے۔
