اسلام آباد : ایف بی آر نے جائیداد کی نئی قیمتیں مقرر کرنے کیلئے ویلیو ایشن ریٹس پر نظرثانی کرنے کا فیصلہ کرلیا تاکہ اسے مارکیٹ کی قیمت کے برابر لایا جائے۔
تفصیلات کے مطابق ایف بی آر نےملک کے 18بڑے شہروں میں غیر منقولہ جائیدادوں کی قیمتوں کو موجود مارکیٹ ریٹ کے مطابق لانے کے لئے ویلیو ایشن ریٹس پر نظرثانی کا فیصلہ کرلیا ہے۔
اس حوالے سے ایف بی آر کی جانب سے تمام چیف کمشنرز ریجنل ٹیکس آفسز کو مراسلہ ارسال کیا ہے ، جس میں کہا گیا ہے کہ پراپرٹی کے نظرثانی شدہ ویلیو ایشن ریٹس پر مبنی ٹیبلز تیار کرکے ایف بی آر کو بھجوائے جائیں تاکہ ویلیو ایشن میں پائی جانے والی ضابطگیوں کو دور کرکے پراپرٹی کے نظرثانی شدہ ویلیوایشن ریٹس جاری کیے جاسکے۔
مراسلے میں کہا ہے کہ اگر موجودہ ویلیو ایشنز میں کسی قسم کا کوئی ابہام ہیں تو تو ان کی بھی نشاندہی کی جائے اور واضح کیا کہ اگر کوئی ایریا ایف بی آر ویلیوایشن ٹیبل میں شامل ہونے سے رہ گیا تو چیف کمشنر پر اس کی ذمہ داری ہوگی ۔
ایف بی آر نے تمام ریجنل چیف کمشنرز سے 13 اکتوبر تک پراپرٹی ویلیو ایشن طلب کر لی ہیں۔
ذرائع کا کہنا ہے کہ ایف بی آر نے قیمتوں کے جدول میں شرح کو بڑھانے کی حکمت عملی مرتب کرلی ہے تاکہ قیمتوں کو مارکیٹ میں رائج شرح کے قریب لایا جاسکے۔
