اسلام آباد : وزیر اعظم عمران خان کے سٹیزن پورٹل پر ایف بی آر کو خصوصی کیٹیگری کے طور پر شامل کرلیا گیا ، اب شہری سٹیزن پورٹل پرایف بی آر سے متعلق شکایات درج کرا سکیں گے۔
تفصیلات کے مطابق وزیر اعظم عمران خان کی ہدایت پر فیڈرل بورڈ آف ریونیو (ایف بی آر) کی شکایات کے حل سے متعلق بڑا فیصلہ کرتے ہوئے سٹیزن پورٹل پرایف بی آرکوخصوصی کیٹیگری کےطور پرشامل کر لیا گیا۔
ایف بی آر سے متعلق شہری شکایات سٹیزن پورٹل پر درج کرا سکیں گے، فیصلہ چیئرمین ایف بی آر کی خصوصی بریفنگ کے بعد کیا گیا ہے۔
وزیر اعظم آفس کی جانب سے ایف بی آر کو مراسلہ جاری کیا گیا ، جس میں کہا گیا ہے ایف بی آر خصوصی کیٹیگری کے طور پر شامل کرلیا گیا ہے ، ٹیکس دہندگان اورشہریوں کی شکایات کاجلد حل ممکن ہو گا، ایف بی آر کیٹیگری سے شہریوں کو اصلاحات پالیسی سے آگاہی ہو گی۔
ایف بی آر ذرائع کا کہنا ہے کہ سٹیزن پورٹل میں ایف بی آربھی شامل ہے، ایف بی آرنےخودسٹیزن پورٹل میں شامل ہونےکی درخواست دی تھی۔
یاد رہے گزشتہ ماہ وزیر اعظم نے پاکستان سٹیزن پورٹل سے متعلق آگاہی مہم چلانے کی ہدایت کی تھی، وزیر اعظم آفس کی جانب سے وزارتوں، محکموں اور ڈویژن کو مراسلہ جاری کر کے کہا گیا تھا کہ سٹیزن پورٹل کی سہولت سے لوگوں کی بڑی تعداد ناواقف ہے، اس لیے عوام کو اس سلسلے میں بہتر طور پر آگاہ کیا جائے۔
