The news is by your side.

Advertisement

وفاقی کابینہ نے 2 کرونا ویکسینز کی قیمت فروخت کی منظوری دے دی

اسلام آباد: وفاقی کابینہ نے 2 کرونا ویکسینز کی قیمت فروخت کی منظوری دے دی۔

تفصیلات کے مطابق حکومت نے پاکستان میں نجی سیکٹر کی جانب سے درآمد کردہ کرونا ویکسینز کی قیمتوں سے متعلق ڈریپ کی ارسال کردہ سفارشات کی حتمی منظوری دے دی۔

روسی ویکسین اسپوتنک V کی 2 خوراک پر مشتمل پیک کی قیمت 8 ہزار 449 روپے ہوگی، جب کہ 4 خوراک پر مشتمل پیک کی قیمت 16 ہزار 560 روپے ہوگی۔

اسپوتنک V کی 10 خوراک پر مشتمل پیک کی قیمت 40 ہزار 555 روپے ہوگی، جب کہ 20 خوراک پر مشتمل پیک کی قیمت 81 ہزار 110 روپے ہوگی۔

چینی کمپنی کی تیار کردہ کرونا ویکسین کنویڈیساکی فی انجکشن کی قیمت 4 ہزار 225 روپے ہوگی۔

واضح رہے کہ آج ہی ڈریپ نے وفاقی کابینہ کو سفارشات ارسال کی تھیں، کابینہ سے منظوری ملنے کے بعد اب ڈریپ کرونا ویکسینز کی قیمتوں کا باقاعدہ نوٹیفکیشن بھی جاری کرے گی۔

واضح رہے کہ کراچی کی ایک فارما کمپنی نے روسی ساختہ کرونا ویکسین اسپوتنک V کی 50 ہزار ڈوز درآمد کی ہیں، جب کہ ایک ملٹی نیشنل فارما کمپنی چینی ویکسین درآمد کر رہی ہے، چینی کمپنی کی کرونا ویکسین ایک خوراک پر مشتمل ہے۔

ذرائع کا کہنا ہے کہ نجی سیکٹر کی درآمد کردہ ویکسین کی قیمت کا تعین ڈریپ نے کیا ہے، جس کے لیے ڈریپ کے پرائسنگ اور کاسٹنگ بورڈ کا اجلاس 19 مارچ کو ہوا تھا۔

Comments

یہ بھی پڑھیں