اسلام آباد : وزیراعظم عمران خان کی زیر صدارت وفاقی کابینہ کے اجلاس میں الیکٹرک موٹر وہیکل پالیسی کی منظوری دے دی گئی، وزیراعظم نے معاشی ٹیم کو خراج تحسین پیش کرتے ہوئے کہا اراکین کابینہ اپنے زیر التوا منصوبے جلد از جلد مکمل کریں ، اپوزیشن کو اعتراض کا موقع نہیں ملنا چاہیے۔
تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس ہوا ، جس میں 10 نکاتی ایجنڈے پر غور کیا گیا، وفاقی کابینہ نے الیکٹرک موٹر وہیکل پالیسی کی منظوری دے دی۔
وفاقی کابینہ کے اجلاس میں 8ایجنڈا آئٹم کی منظوری دی گئی اور سی ڈی اے ری اسٹرکچرنگ کیلئے ایکشن پلان اور ٹائم لائن تیارکرنے کی ہدایت بھی کی گئی۔
کابینہ کے اجلاس میں اقتصادی صورتحال پر تفصیلی بریفنگ دی گئی، جس پر وزیر عظم نے کہا وزارت تجارت،صنعت وپیداواربھئی الیکٹرک موٹرپالیسی پر رہنمائی کرے۔
وزیراعظم عمران خان نے معاشی ٹیم کو خراج تحسین کرتے ہوئے کہا معاشی ترقی میں بہتری سےعوام کو فائدہ ہوگا، مشکلات کے باوجود معاشی اعشاریے مثبت ہیں، اراکین کابینہ اپنے زیر التوا منصوبے جلد از جلد مکمل کریں۔
وزیر اعظم کا کہنا تھا کہ مہنگائی کے خاتمہ کیلئے مشترکہ کاوشیں کی جائیں ، اپوزیشن کو اعتراض کا موقع نہیں ملناچاہیے۔
دوسری جانب وزیراعظم نے آج شام حکومتی ترجمانوں کا اہم اجلاس طلب کرلیا ہے ، اجلاس آج شام 5 بجے وزیراعظم ہاؤس میں ہو گا، جس میں سیاسی صورت حال پرترجمانوں کواعتماد میں لیاجائےگا اور اہم مشاورت ہو گی۔
مرکزی اورصوبائی حکومت کے ترجمانوں کواجلاس میں شرکت یقینی بنانے کی ہدایت کی گئی ہے ، اجلاس میں وزیراعظم حکومتی پالیسی اور بیانیےسے آگاہی اوراہم گائیڈ لائنز دیں گے۔
اس سے قبل وزیراعظم عمران خان سے پرویز خٹک کی سربراہی میں حکومتی مذاکراتی کمیٹی نے ملاقات کی تھی، جس میں چوہدری پرویز الہٰی نے وزیراعظم کو مولانا سے ہونے والی ملاقات پر بریفنگ دی۔
چوہدری پرویز الہٰی نے وزیراعظم عمران خان کو مولانا فضل الرحمان کے مطالبات سے متعلق آگاہ کیا، جس پر وزیراعظم عمران خان نے کہا تھا کہ حکومتی کمیٹی مکمل اختیار کے ساتھ رہبر کمیٹی سے مذاکرات کرے، استعفے کے علاوہ تمام جائز مطالبات ماننے کو تیار ہیں۔
