اسلام آباد: نگراں وزیرتجارت و صنعت ڈاکٹر گوہر اعجاز نے کہا ہے کہ شہریوں کو سستی چینی کی فراہمی کے لیے کوشش کررہے ہیں۔
تفصیلات کے مطابق ڈاکٹر گوہر اعجازکا کہنا تھا کہ ماضی کی پالیسیوں کو مزید نہیں جاری رکھ سکتے۔ عوام کو سستی چینی فراہم کرنے کی کوشش کر رہے ہیں۔
گوہراعجاز نے کہا کہ چینی کی برآمد کی اجازت نہیں دے سکتے۔ پہلے چینی کو برآمد کرنے اور پھر درآمد کی اجازت نہیں دے سکتے۔
نگراں وزیر تجارت وصنعت گوہر اعجاز نے کہا کہ شوگر سیکٹر کے ٹریک اینڈ ٹریس پر جلد اجلاس منعقد کیا جائےگا۔
واضح رہے کہ گزشتہ ہفتے بین الاقوامی مارکیٹ میں چینی کی قیمت 28 سینٹ فی پاؤنڈ اضافے کے بعد گذشتہ 12 سال کی بلند ترین سطح پر پہنچ گئی تھی۔
بھارتی برآمدات میں کمی اور برازیل میں رسد کے مسائل کی وجہ سے چینی کی سپلائی میں کمی دیکھی جارہی ہے۔
انٹرنیشنل شوگر آرگنائزیشن کی رپورٹ کے مطابق 15 دن میں چینی کی اوسط قیمت حالیہ ہفتوں میں 26 سینٹ سے اوپر رہی تھی۔
