کراچی: وفاقی اردو یونیورسٹی میں دو طلبہ تنظیموں کے درمیان تصادم کے نتیجے میں دو پروفیسر زخمی ہوگئے ہیں۔
انتظامیہ کے مطابق یونیورسٹی میں دو طلبہ تنظیموں کے درمیان معمولی تلخ کلامی ہوئی جس پر طلبا نے ایک دوسرے پر حملہ کردیا، جھگڑے میں آہنی راڈ، ڈنڈوں اور کرسیوں کا آذادانہ استعمال کیا گیا۔
تصادم کے دوران دو پروفیسرز بھی زخمی ہوئے، زخمیوں میں پروفیسر رانی ارم اور شعبہ اردو کے پروفیسر حیدرعباس زخمی ہوئے، جنہیں طبی امداد کے لئے سول اسپتال منتقل کیا گیا ہے۔
ڈاکٹرز کے مطابق پروفیسر عباس کے سر میں زخم آئے جبکہ پروفیسر رانی ارم کا ہاتھ زخمی ہوا، تصادم کے بعد دونوں جانب سے طلبا شدید مشتعل ہوئے اور ایک دوسرے کے خلاف سخت نعرے بازی کی۔
پولیس نے مشتعل طلبا کے خلاف ایکشن لیتے ہوئے 22 سے زائد طلبا کو حراست میں لے لیا ہے، جامعہ اردو سول اسپتال کیمپس کی صورت حال قابو میں ہے، کسی بھی ناخوشگوار واقعے کے پیش نظر یونیورسٹی کو دو دن کے لئے بند کردیا گیا ہے۔
