بھارت کی ریاست راجستھان میں روزانہ بیوی کے ہاتھوں پٹنے والا شوہر بالآخر اذیت سے پریشان آ کر پولیس اسٹیشن پہنچ گیا۔
مقامی میڈیا کی رپورٹس کے مطابق وکرم نامی شخص کو اس کی بیوی رچنا روزانہ تشدد کا نشانہ بناتی تھی، ایک دن وہ تنگ آکر رچنا کے خلاف ایف آئی آر کٹوانے پولیس اسٹیشن پہنچ گیا۔
تھانے میں جب اس نے شکایت بیان کی تو اہلکار حیران رہ گئے۔ اس نے بتایا کہ میری اہلیہ مجھے طمانچہ مارتی ہے اور کالر سے پکڑ کر کھیچنتی بھی ہیں۔
اس نے بتایا کہ وہ مجھے گالیاں دیتی ہے اور دھمکاتی بھی ہے کہ تمہاری نازیبا ویڈیوز بنا کر نہ تمہارے والدین کو بھیجوں گی بلکہ سوشل میڈیا پر بھی وائرل کر دوں گی۔
شوہر نے پولیس کو یہ بھی بتایا کہ میری بیوی مجھے سب کے سامنے ذلیل کرتی ہے۔
پولیس نے خاتون کے خلاف مقدمہ درج کر کے معاملے کی تفتیش شروع کر دی۔ پولیس کے مطابق میاں بیوی کے درمیان کافی وقت سے تنازع چل رہا ہے اور جوڑے کے دو بچے بھی ہیں۔
