اسلام آباد : سائفر کیس میں آفیشل سیکرٹ ایکٹ عدالت اسلام آباد نے پی ٹی آئی رہنما اسد عمر کی عبوری ضمانت منظور کرتے ہوئے ایف آئی اے کو اسد عمر کی گرفتاری سے روک دیا۔
تفصیلات کے مطابق آفیشل سیکرٹ ایکٹ عدالت میں تحریک انصاف کے رہنما اسد عمر نے سائفرکیس میں درخواست ضمانت از گرفتاری دائر کردی۔
وکلا بابر اعوان اور سردار مصروف کے ذریعے درخواست ضمانت دائر کی گئی، ضمانت قبل از گرفتاری کی درخواست پر آفیشل سیکرٹ ایکٹ عدالت کے جج ابوالحسنات ذوالقرنین نے سماعت کی۔
درخواست میں موقف اختیار کیا گیا کہ اسدعمر کے خلاف سائفرکیس سیاسی بنیادوں پر بنایاگیا،سائفرکیس اسدعمر کے خلاف بےبنیاد ہے، مقدمے میں دفعات غلط ہیں، اسدعمر شامل تفتیش ہونے کو تیار ہیں، درخواست ضمانت منظور کی جائے۔
آفیشل سیکرٹ ایکٹ عدالت نے اسدعمر کی 29 اگست تک عبوری ضمانت منظور کرلی اور ایف آئی اے کو اسد عمر کی گرفتاری سے روک دیا۔
عدالت نے اسد عمر کو ایک لاکھ روپے کے ضمانتی مچلکے جمع کرانے کی ہدایت کردی۔
