اسلام آباد : آڈیو لیکس کے معاملے پر ایف آئی اے کی تحقیقاتی سب کمیٹی تشکیل دے دی گئی، تحقیقاتی ٹیم کی قیادت ڈائریکٹر ایف آئی اے اسلام آباد زون کریں گے۔
تفصیلات کے مطابق کابینہ کی سفارش پر آڈیو لیکس کے معاملے پر ایف آئی اے کی تحقیقاتی سب کمیٹی تشکیل دے دی گئی اورسب کمیٹی کا باضابطہ نوٹیفکیشن جاری کردیا گیا۔
نوٹیفکیشن میں بتایا گیا کہ تحقیقاتی ٹیم کی قیادت ڈائریکٹر ایف آئی اے اسلام آباد زون کریں گے جبکہ ایڈیشنل ڈائریکٹر، ڈپٹی ڈائریکٹر اور اسسٹنٹ ڈائریکٹرکمیٹی کے ممبرہوں گے۔
جاری نوٹیفکیشن کے مطابق کمیٹی میں آئی ایس آئی گریڈ انیس کے آفیسر ، انٹیلی جنس اور انٹیلی جنس بیورو کے افسران کو بھی شامل کیا جائے گا، تمام افسران گریڈ 19 کے ہوں گے۔
خیال رہے وزیر اعظم ہاؤس کی آڈیو لیکس کے سلسلے میں تشکیل شدہ 12 رکنی تحقیقاتی کمیٹی کا پہلا اجلاس آج ہوگا،سائبر سیکیورٹی کی تحقیقاتی کمیٹی کی سربراہی وزیر داخلہ کریں گے۔
کمیٹی تحقیقاتی رپورٹ اور سفارشات وزیر اعظم کو دے گی، اجلاس میں اسٹریٹجک اداروں، وزیر اعظم ہاؤس اور دفتر کے سیکیورٹی پروٹوکول پر بھی نظرثانی کی جائے گی۔
