وزیر خزانہ محمد اورنگزیب نے ٹیکس چوروں کے خلاف اعلان جنگ کرتے ہوئے کہا ہے کہ کچھ بھی ہو جائے ٹیکس فراڈ کی روک تھام کریں گے۔
اے آر وائی نیوز کے مطابق وزیر خزانہ محمد اورنگزیب نے ایف بی آر اسلام آباد میں نیوز کانفرنس کرتے ہوئے کہا ہے کہ پاکستان میں سالانہ ٹیکس کی چوری 7 ہزار ارب کے قریب ہے جس میں سے صرف سیلز ٹیکس کی چوری 3400 ارب کے لگ بھگ ہے۔ آج میں ٹیکس چوروں کے خلاف اعلان جنگ کر رہا ہوں، چاہے کچھ بھی ہو جائے ٹیکس فراڈ کی روک تھام کر کے رہیں گے۔
وزیر خزانہ نے کہا کہ اسٹیل سیکٹر میں صرف 50 فیصد ٹیکس مل رہا ہے۔ سیمنٹ سیکٹر میں 18 ارب روپے اور بیٹری سیکٹر میں 11 ارب روپے کی ٹیکس چوری اور فراڈ ہے۔ مختلف کمپنیوں کی جانب سے 29 ارب روپے کا ٹیکس فراڈ ہوتا ہے۔
ان کا کہنا تھا کہ 3 لاکھ کمپنیز سیلز ٹیکس کیلیے رجسٹرڈ ہیں۔ کمپنیوں کا ایکسٹرنل آڈٹ سخت کیا جائے گا۔ وزیراعظم نے آڈٹ اوور سائٹس کو مزید بہتر بنانے کی یقین دہانی کرائی۔
محمد اورنگزیب نے مزید کہا کہ ٹیکس واجبات ادا کرنے سے ملکی خزانے کا بوجھ ہلکا ہوگا۔ پاکستان میں ٹیکسوں کا سارا بوجھ تنخواہ دار طبقے پر ہے، ہم معیشت میں ٹیکسز کا حصہ 13.5 فیصد تک پہنچانا چاہتے ہیں۔
ان کا کہنا تھا کہ پاکستان کی معیشت بہتر ہو رہی ہے اور توانائی کی اصلاحات پر پیش قدمی ہو رہی ہے۔ اب حکومت ٹیکس اصلاحات پر عمل درآمد تیز کر رہی ہے اور ٹیکس چوری روکنے کے لیے ہر قدم اٹھائیں گے۔
پاکستان میں غربت کی شرح میں اضافہ اور بجلی کی قیمت زیادہ، عالمی بینک کی رپورٹ میں چشم کشا انکشافات
