بہاولپور : مسلم لیگ نون کی چیف آرگنائزر مریم نواز کے خلاف ایک اور مقدمہ درج کرنے کی درخواست دائر کردی گئی، اس سے قبل تین شہروں میں توہین عدالت سے حوالے سے مقدمات درج کرنے کی درخواستیں دی گئی ہیں۔
تفصیلات کے مطابق پنجاب کے ضلع لیہ، سندھ کے شہر سکھر اور شیخوپورہ کے بعد اب پنجاب کے شہر بہاولپور میں مریم نوازکے خلاف اندراج مقدمہ کی درخواست دائر کی گئی ہے۔
بہاولپور کے شہری خرم خان کی جانب سے تھانہ بغداد الجدید میں درخواست جمع کرائی گئی ہے جس میں مؤقف اختیار کیا گیا ہے کہ مریم نواز نے اپنی تقریر میں اعلیٰ عدلیہ کے ججز اور سابق فوجی افسران کیخلاف نازیبا زبان استعال کی۔
درخواست کے متن میں لکھا ہے کہ مریم نواز نے جلسے سے خطاب کے دوران ججوں پر بےبنیاد الزامات عائد کیے اور عدلیہ کو متنازع بنا کر شرانگیزی کی ہے۔
درخواست گزار نے استدعا کی ہے کہ مریم نواز اس کی تقریر سے مجھ سمیت تمام محب وطن عوام کے جذبات مجروح ہوئے لہٰذا مریم نواز کیخلاف عدلیہ اور فوج مخالف شرانگیزی پھیلانے کا مقدمہ درج کیا جائے۔
مزید پڑھیں : مریم نواز کیخلاف مقدمہ کیلیے شیخوپورہ میں درخواست جمع
گزشتہ روز سول سوسائٹی نیٹ ورک نے مریم نواز کے خلاف توہین عدالت کی کارروائی کیلیے درخواست دائر کی تھی جس میں مؤقف اختیار کیا گیا تھا کہ مریم نواز کی سربراہی میں (ن) لیگ عدالت مخالف پروپیگنڈا کر رہی ہے اور مذموم مقاصد کیلیے ججز کو بدنام کر رہی ہے۔
