لاہور: بھاٹی گیٹ میں مکان میں آتش زدگی کے باعث ایک ہی خاندان کے 10 افراد جاں بحق ہو گئے۔
تفصیلات کے مطابق لاہور کے علاقے بھاٹی گیٹ محلہ سمیاں میں آتشزدگی کا انتہائی افسوس ناک واقعہ پیش آیا ہے، جس میں ایک ہی خاندان کے دس افراد زندگی کی بازی ہار گئے۔
ریسکیو ذرائع کے مطابق ابتدائی تحقیقات سے ظاہر ہوتا ہے کہ مکان میں آگ شارٹ سرکٹ کے باعث لگی، ریسکیو عملے نے مکان میں لگنے والی آگ پر قابو پا لیا ہے، اور کولنگ کا عمل جاری ہے۔
ریسکیو ذرائع کے مطابق جاں بحق ہونے والوں میں بچے اور خواتین بھی شامل ہیں، تمام میتیں اسپتال منتقل کر دی گئی ہیں، آگ نے مکان کی تینوں منزلوں کو اپنی لپیٹ میں لے لیا تھا، متاثرہ عمارت میں ظہیر الدین بابر کی فیملی رہائش پذیر تھی۔
آگ لگنے سے عمارت میں موجود تمام افراد پھنس گئے تھے، اور آگ لگتے ہی فیملی کے تمام افراد نے خود کو مکان کے پچھلے کمرے میں بند کر لیا تھا، تاہم ان کی جانیں نہیں بچائی جا سکیں۔
