کراچی: وزارت ریلوے نے کراچی ایکسپریس کی بوگی میں آتش زدگی کا نوٹس لے لیا، لاپتا افراد کی تلاش بھی جاری ہے۔
تفصیلات کے مطابق کراچی ایکسپریس میں آگ لگنے کے واقعے پر وزارت ریلوے نے نوٹس لیتے ہوئے تحقیقات کا حکم دے دیا، واقعے میں 2 مسافر جاں بحق ہوئے جب کہ 4 مسافر کوچ سے لا پتا ہیں جن کی تلاش جاری ہے۔
وزارت ریلوے کے مطابق 26 اور 27 اپریل کی درمیانی شب ساڑھے بارہ بجے کراچی سے لاہور جانے والی کراچی ایکسپریس کی اے سی بزنس کوچ میں آگ لگنے کی اطلاع موصول ہوئی تھی، اور گاڑی کو ٹنڈو مستی خان اسٹیشن کے قریب روک لیا گیا تھا۔
وزارت ریلوے کا کہنا ہے کہ ہنگامی طور پر فائر بریگیڈ کو اطلاع دی گئی، جس پر فائر بریگیڈ کی پہلی گاڑی رات ایک بج کر پچاس منٹ تک موقع پر پہنچی، اور تقریباً چالیس منٹ کی تگ و دو کے بعد آگ پر قابو پالیا گیا۔
وزارت ریلوے کے مطابق 70 سالہ رابعہ بی بی متاثرہ کوچ سے چھلانگ لگانے پر شدید زخمی ہوئیں اور بعد ازاں زخموں کی تاب نہ لا سکیں، جاں بحق ہونے والے دوسرے مسافر کی تا حال شناخت نہیں ہو سکی ہے۔
واقعے کے بعد ڈی ایس سکھر، ڈی سی او سکھر اور دیگر ریلوے افسران موقع پر موجود رہے، اور صورت حال کی نگرانی اور وزارت میں رپورٹ کرتے رہے، کراچی ایکسپریس کو متاثرہ کوچ سے علیحدہ کرنے کے بعد صبح پونے 7 بجے اپنی منزل کی جانب روانہ کیا گیا۔
کراچی سے لاہور جانے والی کراچی ایکسپریس کی بوگی میں آتشزدگی، 2 افراد جاں بحق
وزارت ریلوے کے مطابق واقعے کا سخت نوٹس لیتے ہوئے تحقیقات کا حکم دے دیا گیا ہے، اور اس ضمن میں فیڈرل گورنمنٹ انسپکٹر آف ریلویز کی سربراہی میں ٹیم جائے وقوعہ کے لیے روانہ ہو چکی ہے، تحقیقات مکمل ہوتے ہی میڈیا کو بھی آگاہ کیا جائے گا۔
