لندن: برطانیہ میں کرونا وائرس کے نئے اور سب سے زیادہ متعدی ویرینٹ اومیکرون سے پہلی ہلاکت سامنے آئی ہے۔
تفصیلات کے مطابق برطانوی وزیر اعظم بورس جانسن نے تصدیق کرتے ہوئے کہا ہے کہ ملک میں ایک شخص کی اومیکرون ویرینٹ سے موت واقع ہوئی ہے۔
بورس جانسن نے کہا کہ نئے ویرینٹ کا نتیجہ مریضوں کے اسپتال داخلے کی صورت میں بھی نکل رہا ہے اور لوگ جو "بہترین چیز” کر سکتے ہیں وہ یہ ہے کہ بوسٹر ڈوز حاصل کی جائے۔
لندن میں ایک ویکسینیشن کلینک کا دورہ کرتے ہوئے انھوں نے کہا کہ لوگوں کو اس خیال کو ایک طرف رکھ دینا چاہیے کہ اومیکرون کرونا کی بغیر شدت والی ایک ہلکی قِسم ہے۔
اتوار کو وزیر اعظم جانسن نے انگلینڈ میں تمام بالغوں کے لیے ایک نیا ہدف مقرر کیا ہے کہ اس مہینے کے آخر تک ان کے لیے بوسٹر ڈوز کی شروعات کر دی جائیں۔
یاد رہے کہ پیر کے روز برطانوی سیکریٹری صحت ساجد جاوید نے کہا تھا کہ 10 لوگ اومیکرون ویرینٹ کے ساتھ اسپتال میں زیر علاج ہیں۔
