دبئی : متحدہ عرب امارات کی پولیس نے جیولری کمپنی کو بدنام کرنے کے لیے سماجی رابطوں کی ویب سائٹوں پر مہم چلانے والے پانچ بھارتی شہریوں کو گرفتار کرکے عدالت میں پیش کردیا۔
تفصیلات کے مطابق دبئی میں پولیس نے کارروائی کرتے ہوئے بھارت سے تعلق رکھنے والے پانچ افراد کو یو اے ائ کے مشہور سونے کے تاجر اور کمپنی کے خلاف سوشل میڈیا پر جھوٹی خبریں چلانے اور بدنام کرنے کے الزام میں گرفتار کیا گیا ہے۔
دبئی پولیس کے ترجمان نے گرفتاریوں کی تصدیق کرتے ہوئے کہا کہ گرفتار بھارتیوں میں سے ایک شخص نے دورانِ تفتیش اقرار کیا ہے کہ پانچ افراد پر مشتمل گروپ گذشتہ کچھ دنوں سے سونے کے مشہور تاجر کلیان گروپ کے خلاف سماجی رابطوں کی مختلف ویب سائٹز پر مہم جوئی کررہے تھے۔
ترجمان کا کہنا تھا کہ ملزمان مذکورہ کمپنی کو بدنام کرنے کے لیے سوشل میڈیا پر افوا ہیں پھیلا رہے تھے کہ کمپنی کی سونے سے تیار کردہ جیولری جعلی اور ملاوت شدہ ہیں، سونے کے تاجر اور اس کے کمپنی کے خلاف مہم چلانے والے گروپ کے گرفتار کیے گئے دیگر چار ملزمان سے تحقیقات جاری ہیں۔
ان کا کہنا تھا کہ ملزمان کی جانب سے ’کلیان جیولرز‘ کے خلاف سوشل میڈیا کی مختلف ویب سائٹز بالخصوص واٹس ایپ گروپ میں سب سے زیادہ مہم چلائی گئی، ملزمان نے سماجی رابطوں کی ویب سائٹز پر لگائی گئی پوسٹوں میں دعویٰ کیا تھا کہ دبئی میں مذکورہ کمپنی کےتمام شو روم کو بند کرکے مالکان کو گرفتار کرلیا گیا ہے۔
پولیس کے ترجمان کا مزید کہنا کہ پانچوں بھارتی ملزمان نے کلیان گروپ کو بدنام کرنے کے لیے ویڈیوز اور تصاویر بناکر سوشل میڈیا پر پوسٹ کررہے تھے،متاثرہ کمپنی کے مالکان کی شکایت پر پولیس نے سوشل میڈیا ایکٹ کے تحت کارروائی کرتے ہوئے پانچوں بھارتی شہریوں کر گرفتار کرکے عدالت میں پیش کردیا ہے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
