پشاور: صوبہ خیبر پختونخواہ کے علاقے کوہستان کے 3 اضلاع میں انسانی بحران پیدا ہونے کا خدشہ ہے جس کے بعد فلاحی اداروں اور عالمی تنظمیوں سے فوری مدد کی اپیل کردی گئی۔
تفصیلات کے مطابق پاکستان ہلال احمر خیبر پختونخواہ نے پختونخواہ کے علاقے کوہستان میں نقصانات سے متعلق ابتدائی رپورٹ جاری کردی، کوہستان کے 3 اضلاع میں انسانی بحران پیدا ہونے کا خدشہ ہے۔
ہلال احمر کی رپورٹ لوئر کوہستان، اپر کوہستان اور کولائی پالس میں ہونے والے نقصانات سے متعلق ہے۔
ہلال احمر کا کہنا ہے کہ ابتدائی رپورٹ کے مطابق کوہستان میں 630 گھر مکمل طور پر تباہ ہوگئے، جبکہ 250 گھروں کو جزوی نقصان پہنچا۔ تینوں اضلاع میں 23 افراد جاں بحق اور 10 زخمی ہوئے ہیں۔
رپورٹ کے مطابق علاقے میں زرعی زمین متاثر اور مویشیوں کی اموات ہوئی ہیں، کئی علاقوں کا زمینی راستہ منقطع ہوچکا ہے جبکہ پانی کی لائنیں بھی تباہ ہوچکی ہیں۔
ہلال احمر کا کہنا ہے کہ زمینی راستے منقطع ہونے سے خوراک اور پانی کی شدید قلت کا سامنا ہے۔ ہلال احمر پختونخواہ نے دیگر فلاحی اداروں اور عالمی تنظمیوں سے فوری مدد کی اپیل کی ہے۔
