لاہور: پنجاب کے مختلف علاقوں میں شدید دھند کے باعث موٹر وے کو متعدد مقامات پر آمدو رفت کے لئے بند کردیا گیا ہے، موٹر وے پولیس نے عوام سے حفاظتی تدابیر اختیار کرنے کا کہا ہے۔
اے آر وائی نیوز کے مطابق ترجمان موٹروے پولیس کا کہنا ہے کہ موٹروے ایم2 اسلام آباد سے کوٹ مومن تک دھند کے باعث بند ہے جبکہ موٹروے ایم 2 پنڈی بھٹیاں سے لاہور اور کوٹ مومن کیلیے بند کردی گئی ہے۔
اس کے علاوہ موٹروے ایم 4 پنڈی بھٹیاں سے عبدالحکیم تک دھندکے باعث بند ہے جبکہ ایم 2 لاہور سے کوٹ مومن دھند کی وجہ سے بند ہے۔ موٹروے ایم 3 فیض پور سے درخانہ تک اور لاہور سیالکوٹ موٹر وے بھی بند کردی گئی ہے۔
موٹروے ایم 4 ملتان فیصل آباد، موٹروے ایم 5 شیرشاہ سے روہڑی، موٹروے ایم 5 اوچ شریف سے ظاہر پیر شدید دھند کے باعث بند کردی گئی ہے۔
ترجمان موٹروے پولیس کے مطابق موٹروے بند کرنے کا مقصد حادثات سے بچاؤ اور موٹروے استعمال کرنے والوں کے جان و مال کا تحفظ ہے، شہریوں سے درخواست ہے کہ دھند کہ اوقات میں غیر ضروری سفر سے گریز کریں۔
اپنا سفر دن کی روشنی میں مکمل کر کے دھند کے آغاز سے پہلے اپنے منزل مقصود تک پہنچ جائیں – گاڑیوں میں فوگ لائٹس کا استعمال کریں، تیز رفتاری سے گریز کریں اور اگلی گاڑی سے مناسب فاصلہ معمول سے زیادہ رکھیں۔
ترجمان موٹروے پولیس کا کہنا ہے کہ سفر شروع کرنے سے پہلے موٹروے پولیس ہیلپ لائن 130 یا نیشنل ہائی ویز اینڈ موٹروے پولیس کے آفیشل سوشل میڈیا اکاؤنٹ سے بھی تازہ ترین معلومات ضرور حاصل کرلیں۔
