اسلام آباد: زلمے خلیل زاد کے بیان پر ترجمان دفتر خارجہ کا رد عمل سامنے آ گیا۔
تفصیلات کے مطابق امریکا کے سابق خصوصی نمائندے افغانستان زلمے خلیل زاد کے بیان پر ترجمان دفتر خارجہ نے رد عمل دیتے ہوئے کہا ہے کہ پاکستان کو درپیش چیلنجز سے نمٹنے کے لیے کسی سے لیکچرز یا مشورے کی ضرورت نہیں۔
ترجمان نے اپنے بیان میں کہا کہ ایک قوم کے طور پر موجودہ مشکل صورت حال سے مضبوطی سے نکلیں گے۔
واضح رہے کہ لاہورمیں عمران خان کی رہائش گاہ زمان پارک میں دوسرے روز بھی کشیدگی برقرار ہے، عمران خان کے گھر سے پولیس پر پٹرول بم سے حملے بھی کیے گئے جس سے کئی پولیس اہل کار زخمی ہو گئے ہیں اور گاڑیوں کو بھی نقصان پہنچا۔
جب پولیس اہل کار عمران خان کو عدالتی حکم پر گرفتار کرنے پہنچی تو پی ٹی آئی کارکن گیٹ نمبر ایک پر جمع ہوئے، پی ٹی آئی کارکنوں کی جانب سے پولیس اور رینجرز پر پتھراؤ کیا گیا، جب کہ پولیس نے کارکنوں کو منتشر کرنے کے لیے زبردست شیلنگ کی۔
آخر کار لاہور ہائیکورٹ نے زمان پارک میں پولیس آپریشن روکنے کا حکم دے دیا ہے۔
