اسلام آباد: چیمبر آف اسمال ٹریڈرز کے سرپرست شاہد رشید بٹ نے تھوڑے عرصہ میں ڈبوں میں فروخت ہونے والے دودھ کی قیمت میں دو بار کے اضافہ پر تشویش ظاہر کرتے ہوئے کہا ہے کہ حکومت اسکا نوٹس لے۔
اسلام آباد ویمن چیمبر کی کمیٹی برائے ٹریڈ اینڈ انڈسٹری کی چئیرپرسن تنسم انوار سے ملاقات میں انہوں نے کہا کہ دودھ کے ساتھ چینی کی قیمت میں بھی اضافہ بلاجواز ہے،بجٹ میں ڈیری انڈسٹری پر اضافی ٹیکس لگانے سے یہ صنعت مزید مشکلات کا شکار ہو گئی ہے ۔
شاہد رشید بٹ نے کہا کہ خشک دودھ پر بیس فیصد کسٹم ڈیوٹی اور پچیس فیصد ریگولیٹری ڈیوٹی نافذ کرنے سے اسکا استعمال کم ہو جائے گا ، جس سے صحت عامہ کے مسائل جنم لینگے جبکہ سب سے زیادہ اثر بچوں پر پڑے گا جن میں سے تقریباً نصف پہلے ہی غذا کی کمی کے سبب کمزور ہیں ۔
حکومت نے یہ فیصلہ دودھ کا کاروبار کرنے والے بڑے جاگیرداروں کو خوش کرنے کیلئے کیا ہے تاکہ الیکشن میں انکی حمایت حاصل کی جا سکے۔
