پاکستان تحریک انصاف کے بانی نے کہا ہے کہ مجھے جیل میں رکھنا ہے تو رکھیں مگر باقی لوگوں رہا کر دیا جائے۔
اڈیالہ جیل میں قائم عدالت میں سماعت کے موقع پر صحافیوں سے گفتگو کرتے ہوئے بانی پی ٹی آئی کا کہنا تھا کہ چیف جسٹس سے کہنا چاہتا ہوں کہ پی ٹی آئی کی25 مئی کی پٹیشن سنیں۔
انہوں نے کہا کہ نو مئی واقعات کی تحقیقات کے لیے جوڈیشل کمیشن بنایا جائے، ان واقعات پر اب تک کوئی عدالتی انکوائری نہیں ہوئی۔
بانی پی ٹی آئی کا کہنا تھا کہ چیف جسٹس قاضی فائز عیسیٰ اس واقعے کی تمام سی سی ٹی وی فوٹیج ریکور کرانے کا حکم دیں، جنہوں نے سی سی ٹی وی فوٹیجز چوری کیں وہی 9مئی کے ذمہ دار ہیں۔
انہوں نے کہا کہ جرم کی معلومات چھپانا بھی ایک جرم ہے، نو مئی کی بنیاد پر ایک سیاسی جماعت کو ختم کیا جا رہا ہے، یہ سب کچھ لندن پلان کے تحت چل رہا ہے۔ مجھے جیل میں رکھنا ہے تو رکھیں مگر باقی لوگوں کو رہا کر دیا جائے
ان کا کہنا تھا کہ نوازشریف، مریم نواز اور آصف زرداری کے تمام مقدمات ختم کردیئے گئے، نوازشریف نے توشہ خانہ سے چھ لاکھ میں مرسیڈیز گاڑی لی، زرداری نے توشہ خانہ سے 3گاڑیاں لیں جو کہ قانونی طور پر نہیں لی جا سکتی، بانی پی ٹی آئی نے کہا کہ کرپشن کی کتابوں والوں کو کلیئر کیا جا رہا ہے۔
انہوں نے کہا کہ 8فروری پر بھی جوڈیشل انکوائری کرائی جائے، دھاندلی زدہ الیکشن کے باعث سینیٹ الیکشن کی قانونی حیثیت نہیں، انتخابات میں اکثریت کو اقلیت میں بدل دیا گیا. لیکشن کمیشن جس نے دھاندلی کرائی وہ کیسے انکوائری کر سکتا ہے۔
ان کا کہنا تھا کہ امریکی عہدیدار ڈونلڈ لو رجیم چینج تسلیم کرلیتا تو دباؤ پوری بائیڈن حکومت پر آتا، نیشنل سیکیورٹی کمیٹی کی میٹنگ میں اسد مجید نے دھمکی کا بتایا تھا۔
ڈونلڈ لو کے بیان پر دوبارہ انکوائری کرائی جائے، امریکی سفیر مجھے ملنے جیل نہیں آئے، جب ملاقات ہوگی تو ڈونلڈ لو کے بیان اور امریکی سفارتخانہ کے کردار پر بات کروں گا۔
حکومت گرانے کے بینفیشری حکومت میں بیٹھ گئے تو انکوائری کیسے ہوگی؟ رانا ثناءاللہ کے بیان پر یہی کہنا چاہوں گا مافیاز ایسا ہی کرتے ہیں، ہم 8 فروری والے ہیں سیاسی طور پر مقابلہ کرتے ہیں۔
بانی پی ٹی آئی کا مزید کہنا تھا کہ پنجاب میں 40 ایم پی ایز کے فارورڈ بلاک سے متعلق علم نہیں، پنجاب کے پارلیمانی لیڈر سے ملاقات کی اجازت دیں تو معلومات لوں۔
