لیبرویل: وسطی افریقی ملک گبون میں اقتدار پر قبضہ جمانے کے بعد فوجی انتظامیہ نے برّی، فضائی اور بحری سرحدیں کھول دی ہیں۔
غیر ملکی میڈیا رپورٹس کے مطابق گبون میں فوجی انتظامیہ نے ملک کی برّی، فضائی اور بحری حدود کو کھول دیا ہے، فوجی جنتا کے رہنما جنرل برائس نگوما نے عبوری صدر کا حلف بھی اٹھا لیا ہے۔
فوجی انتظامیہ کے ترجمان الریک مینفومبی نے سرکاری ٹی وی پر جاری بیان میں برّی، فضائی اور بحری حدود کے دوبارہ سے کھلنے کا اعلان کیا، ان کا کہنا تھا کہ ان کا مقصد ہمسایہ ممالک اور دنیا بھر کے ساتھ اچھے تعلقات قائم کرنا ہے۔
افریقی ملک گبون میں فوج کا اقتدار پر قبضہ، انتخابی نتائج منسوخ
فوجی انتظامیہ کے مطابق گبون میں داخل ہونے اور نکلنے کے خواہش مند مسافر اپنی سیاحتی دستاویزات پیش کرنے کی صورت میں سفر کر سکیں گے۔
واضح رہے کہ گبون میں 30 اگست کو فوجیوں کے ایک گروپ نے قومی ٹی وی کی عمارت میں داخل ہو کر اقتدار پر قبضے کا اعلان کیا تھا، فوجی انتظامیہ نے 26 اگست کو منعقدہ انتخابات کی منسوخی، ملکی سرحدیں بند کرنے اور پاسداران جمہوریت کے کمانڈر جنرل برائس نگوما کو انتظامیہ کا سربراہ متعین کرنے کا اعلان بھی کیا تھا۔
