راولپنڈی: وفاقی وزیر ریلوے شیخ رشید احمد کا کہنا ہے کہ گلگت بلتستان انتخابات میں تحریک انصاف کو 13 نشستیں چاہئیں جو وہ پوری کرلے گی۔
اے آر وائی نیوز سے خصوصی گفتگو کرتے ہوئے وزیر ریلوے شیخ رشید نے کہا کہ گلگت بلتستان انتخابات میں تحریک انصاف کو 13 نشستیں چاہئیں جو وہ پوری کرلے گی، پی ٹی آئی اور پیپلزپارٹی کا مقابلہ ہوگا، ن لیگ کو چوتھے نمبر پر دیکھتا ہوں۔
انہوں نے کہا کہ پیپلزپارٹی کی 5 سے 7 کے درمیان سیٹیں دیکھ رہا ہوں، ن لیگ کی گلگت بلتستان میں ایک یا دو نشستیں دیکھ رہا ہوں۔
شیخ رشید نے کہا کہ گلگت بلتستان میں تمام پارٹیوں نے پر امن جلسے کیے، پر امن اور شفاف الیکشن ہوئے ہیں، گلگت بلتستان حساس علاقہ ہے عالمی سازش کا حب ہے، جی بی میں پر امن الیکشن اس سے قبل کبھی نہیں دیکھے۔
مزید پڑھیں: گلگت بلتستان میں پولنگ ختم ، گنتی کا عمل جاری
وزیر ریلوے نے کہا کہ پہاڑوں پر رہنے والے لوگ معاملہ فہم اور دور اندیش ہوتے ہیں، گلگت بلتستان کے لوگوں نے اپنے مسائل کے حل کیے لیے ووٹ دیا۔
واضح رہے کہ گلگت بلتستان کی قانون ساز اسمبلی کے انتخابات کے لیے ووٹنگ کا عمل مکمل ہوگیا ہے، ووٹوں کی گنتی کا سلسلہ جاری ہے۔
گلگت بلتستان کی 24 میں سے 23 نشستوں کے لیے ووٹنگ کا عمل صبح 8 بجے شروع ہوا جو شام 5 بجے تک بلاتعطل جاری رہا۔قانون کے مطابق شام 5 بجے تک پولنگ اسٹیشنز میں موجود افراد ووٹ ڈال سکیں گے۔
