کراچی: تحریک طالبان پاکستان کے لیے سوشل میڈیا پر فنڈز جمع کرنے والے ملزم غلام نبی کو گرفتار کر لیا گیا۔
تفصیلات کے مطابق سی ٹی ڈی نے کراچی کے علاقے ابراہیم حیدری، ریڑھی گوٹھ میں ایک کارروائی کے دوران کالعدم ٹی ٹی پی کا سرگرم کارکن گرفتار کر لیا۔
سی ٹی ڈی کے مطابق دہشت گردوں کی مالی معاونت کرنے والے افراد کی تلاش کے دوران ملزم کی گرفتاری عمل میں آئی، ملزم غلام نبی نے سوشل میڈیا کے ذریعے کالعدم تحریک طالبان پاکستان کے لیے فنڈز جمع کرنے کا انکشاف کیا۔
ملزم کے قبضے سے چندے کی رسیدیں اور رقم بھی برآمد ہوئی ہے، ملزم نے دوران تفتیش انکشاف کیا کہ اسے دہشت گردی کی تربیت کے لیے افغانستان جانا تھا۔
ادھر گزشتہ روز ساہیوال میں بھی مال منڈی چوک سے کالعدم تحریک طالبان کا ایک عہدے دار گرفتار کیا گیا تھا، سی ٹی ڈی کے مطابق دہشت گرد محمد صدیق خان کھلے عام لٹریچر تقسیم کر رہا تھا، ملزم سے افغان جہاد کے 3 کتابچے، 3 ممنوعہ کتابیں، اور عالمی جہاد کا داعی برآمد ہوئے۔
سی ٹی ڈی کا کہنا تھا کہ مبینہ دہشت گرد کا تعلق موضع خیروخیل پکہ تحصیل غزنی خیل ضلع لکی مروت سے ہے، برآمد مواد میں حکومتی نظام و آئین کے خلاف نفرت انگیز، مذہبی منافرت پر مبنی لٹریچر شامل ہے، تھانہ سی ٹی ڈی نے انسداد دہشت گردی ایکٹ کے تحت مقدمہ درج کر لیا۔
