آسٹریلوی کرکٹر گلین میکسویل کے منیجر کا کہنا ہے کہ گلین میکسویل کرکٹ آسٹریلیا کے زیرِ تفتیش نہیں ہیں، انہوں نے معذرت کرلی ہے۔
بی بی ایل میں میلبرن اسٹارز کا سفر تمام ہونے کے بعد اس ٹیم کا حصہ گلین میکس ویل ایڈیلیڈ میں موجود تھے جہاں کرکٹر نے ایک سیلیبریٹی گالف ایونٹ میں بھی شرکت کی تھی۔ اس دوران وہ فراغت کے لمحات گزارنے کلب بھی گئے جہاں شراب نوشی کے باعث ان کی حالت بگڑ گئی۔
’شراب سے متعلق واقعہ‘ میں اسٹار آل راؤنڈر میکس ویل کو مختصر طور پر اسپتال میں داخل کرنا پڑا تھا، جس کے بعد کرکٹ آسٹریلیا نے اس پورے واقعے کی تحقیقات کا فیصلہ کیا تھا تاہم اب کھلاڑی کے منیجر کا بیان سامنے آگیا ہے۔
میکسویل کو اچانک اسپتال میں کیوں داخل کرنا پڑا؟ کرکٹ آسٹریلیا تحقیقات کریگا
میڈیا رپورٹس کے مطابق آسٹریلوی کھلاڑی میکسویل کے منیجر نے کہا کہ ہفتے کو پیش آنے والے واقعے پر گلین میکسویل شرمندہ ہیں، افسردہ ہیں اور معذرت خواہ ہیں جس کے بعد انہوں نے میلبرن واپس آکر ٹریننگ شروع کر دی ہیں۔
کرکٹ آسٹریلیا نے گلین میکسویل کو ویسٹ انڈیز کے خلاف ایک روزہ میچوں کی سیریز میں آرام دیا ہے تاہم وہ ویسٹ انڈیز کے خلاف ٹی ٹوئنٹی سیریز کے لیے ٹیم کا حصہ ہوں گے۔
دوسری جانب آسٹریلیا کے کپتان پیٹ کمنز نے پیش آنے والے واقعات پر گلین میکسویل کے رویے کا جائزہ لینے کا مطالبہ کیا ہے۔
