گلین میکسویل کو کلب میں طبعیت کی اچانک خرابی کے باعث اسپتال میں داخل کرنا پڑا، کرکٹ آسٹریلیا نے اس کی تحقیقات کا فیصلہ کیا ہے۔
بی بی ایل میں میلبرن اسٹارز کا سفر تمام ہونے کے بعد اس ٹیم کا حصہ گلین میکس ویل ایڈیلیڈ میں موجود تھے جہاں کرکٹر نے ایک سیلیبریٹی گالف ایونٹ میں بھی شرکت کی تھی۔ اس دوران وہ فراغت کے لمحات گزارنے کلب بھی گئے جہاں شراب نوشی کے باعث ان کی حالت بگڑ گئی۔
’شراب سے متعلق واقعہ‘ میں اسٹار آل راؤنڈر میکس ویل کو مختصر طور پر اسپتال میں داخل کرنا پڑا تھا، اب کرکٹ آسٹریلیا نے اس پورے واقعے کی تحقیقات کا فیصلہ کیا ہے۔
آسٹریلوی میڈیا کے مطابق، میکسویل مبینہ طور پر پب جانے سے قبل ایڈیلیڈ میں ایک تقریب میں شریک ہوئے تھے، جہاں سابق فاسٹ بولر بریٹ لی اپنے بینڈ سکس اینڈ آؤٹ کے ساتھ پرفارم کر رہے تھے۔
بعدازاں مبینہ طور پر پب جانے کے بعد 35 سالہ پلیئر کو رائل ایڈیلیڈ اسپتال لے جایا گیا۔ رپورٹس میں مزید کہا گیا ہے کہ وہ تھوڑی دیر کے لیے اسپتال گئے تھے اس کے بعد انھیں ڈسچارج کردیا گیا تھا۔
انھیں اسپتال میں داخل کرنے کی وجہ کیا تھی، سی اے اس واقعے کی تحقیقات کر رہا ہے۔ کرکٹ آسٹریلیا نے اپنے بیان میں کہا ہے کہ کرکٹ آسٹریلیا ایڈیلیڈ میں گلین میکسویل کے ساتھ پیش آنے والے واقعے سے آگاہ ہے اور وہ مزید معلومات حاصل کر رہا ہے۔
بیان میں مزید کہا گیا ہے کہ ویسٹ انڈیز کے خلاف تین میچوں کی ٹی ٹوئنٹی سیریز میں میکسویل کی واپسی متوقع ہے جو کہ اگلے ماہ ون ڈے سیریز کے اختتام پر ہوگی۔ اس کے علاوہ ہم مزید کوئی تبصرہ نہیں کرسکتے۔
