کراچی: گورنر اسٹیٹ بینک جمیل احمد کا کہنا ہے کہ ملک میں انفراسٹرکچر کے منصوبوں کے لیے 920 ارب ڈالر سالانہ کی ضرورت ہے، گزشتہ سال کے تباہ کن سیلاب نے ملک کے پہلے سے خستہ حال انفراسٹرکچر کو مزید تباہ کیا ہے۔
تفصیلات کے مطابق گورنر اسٹیٹ بینک جمیل احمد نے انفراسٹرکچر سمٹ سے خطاب کرتے ہوئے کہا کہ انفراسٹرکچر میں سرمایہ کاری سے معیشت میں ترقی ہوتی ہے۔ کرونا وائرس کی وبا کے بعد انفراسٹرکچر منصوبوں میں سرمایہ کاری کی ضرورت بڑھ گئی ہے۔
گورنر اسٹیٹ بینک کا کہنا تھا کہ دنیا بھر میں 2 ارب لوگوں کو پینے کا صاف پانی میسر نہیں، دنیا بھر میں بنیادی سہولیات کی فراہمی کے لیے 80 ہزار ارب ڈالر کی سرمایہ کاری کی ضرورت ہے۔
انہوں نے کہا کہ پاکستان کو انفراسٹرکچر کے منصوبوں کی کمی کا سامنا ہے، انفراسٹرکچر کے منصوبوں کے لیے 920 ارب ڈالر سالانہ کی ضرورت ہے۔
گورنر اسٹیٹ بینک نے مزید کہا کہ توانائی، مواصلات، ٹرانسپورٹ، پینے کا صاف پانی اور دیگر شعبوں میں بڑی سرمایہ کاری کی ضرورت ہے، گزشتہ سال کے تباہ کن سیلاب نے ملک کے پہلے سے خستہ حال انفراسٹرکچر کو مزید تباہ کیا ہے۔
