اسلام آباد : حکومت نے کورونا وائرس کے پھیلاؤ کے باعث بین الاقوامی پروازوں پر پابندی برقرار رکھنے کا فیصلہ کرلیا، تاہم خصوصی پروازوں اور چارٹرڈ طیاروں کو پابندی سے استثنیٰ حاصل ہے۔
تفصیلات کے مطابق حکومت نے انٹر نیشنل فلائٹ آپریشن پر پابندی برقرار رکھنے کا فیصلہ کرلیا اور سول ایوی ایشن نےانٹر نیشنل فلائٹ کی بندش میں مزید 16 دن کی توسیع کردی، اس حوالے سے ڈائریکٹر ٹرانسپورٹ نے باضابطہ نوٹم جاری کردیا ہے۔
نوٹم کے مطابق انٹر نیشنل پروازیں 31مئی تک رات 11بجکر59منٹ تک بند رہیں گی، 15 مئی سے انٹرنیشنل فلائٹ پر پابندی میں مزید 16 دن کی توسیع کی گئی تاہم خصوصی پروازوں اور چارٹرڈ طیاروں کو پابندی سے استثنیٰ حاصل ہے۔
بندش کا اطلاق حکومت کی جانب سے خصوصی پروازوں پر نہیں ہوگا اور کارگو فلائٹس کو بھی پابندی کے فیصلے سے استثنیٰ حاصل ہوگا جبکہ ملک بھر کے ائیرپورٹس سے عالمی فضائی آپریشن کی بندش میں توسیع کردی گئی ہے۔
خیال رہے کہ پاکستان نے عالمی وبا کورونا وائرس کے باعث مارچ سے لاک ڈاؤن میں اندرون و بیرون ملک پروازیں بندش کا شکار ہیں، اس سلسلے میں مرحلہ وار توسیع کا سلسلہ جاری ہے، پابندی کے سبب سول ایوی ایشن اتھارٹی اربوں روپے کے نقصان کا سامنا ہے۔
